Pas humbjes me Turqinë, Federata Shqiptare e Futbollit ka vendosur të ndërpresë zyrtarisht bashkëpunimin me trajnerin Christian Panucci.
“E falenderojmë trajnerin Panucci për punën e zhvilluar deri më tani dhe i urojmë suksese në vazhdimin e karrierës.
Ekipi kombëtar në ndeshjen e dytë zyrtare eliminatore kundër Andorrës në transfertë do të drejtohet nga Ervin Bulku dhe Sulejman Mema, si edhe pjesa tjetër e stafit aktual”, thuhet në deklaratën zyrtare të FSHS-së.
Përballë Turqisë, djemtë e kombëtares ishin të pafuqishëm të siguronin fitoren ndërsa u ndëshkuan me 2 gola nga miqtë.
Christian Panucci ka marrë zyrtarisht drejtimin e Kombëtares në korrik të 2017 dhe objektivi i vendosur nga Presidenti Armand Duka ishte kualifikimi në Euro 2020.
Pas pothuajse dy vite në detyrë, rrugëtimi i Panuccit është ndërprerë dhe ky objektiv do t’i besohet dikujt tjetër.
