Pas vrasjes së avokatit Ravik Gurra, Dhoma e Avokatisë në Elbasan ka vendosur të bojkotojë punën për 1 javë.
Të mbledhur ditën e sotme, Dhoma e Avokatisë gjithashtu ka kërkuar solidaritetin e kolegëve në të gjithë vendin.
Viktima, Gurra, që njihet për mbrojtjen e çështjeve të bujshme si ajo e Çapajve dhe Shullazit, ka qenë i ulur në ambientet e jashtme të një lokalit kur është qëlluar pas koke.
Ai ishte i shoqëruar me dy persona të tjerë në tavolinë, njëri prej tyre gjithashtu avokat.
Autori që e ka qëlluar me pistoletë është larguar me një mjet që është gjetur i djegur në dalje të qytetit të Elbasanit.
Hetimet për zbardhjen e vrasjes së Ravik Gurrës i kanë kaluar Prokurorisë për Krimet e Rënda në Tiranë, pasi bëhet fjalë për ekzekutim të funksionarëve publikë.
Grupi hetimor që po punon për zbardhjen e vrasjes mafioze, ende nuk ka një të dyshuar konkret, ndërkohë që për t’u marrë në pyetje janë shoqëruar shumë persona.