Pasi ofendoi publikisht shqiptarët duke i quajtur terroristë dhe gjakpirës, kryeministri Ramush Haradinaj ka shkarkuar Ministrin e Administratës Publike, Ivan Teodosijeviç.
Përmes një postimi në rrjetet sociale, Haradinaj njoftoi vendimin e marrë, teksa deklaroi se gjuha e urrejtjes është e patolerueshme nga ministri në fjalë.
“Sot kam marrë vendim për shkarkimin e Ministrit të Administratës së Pushtetit Lokal, Ivan Teodosijeviç. Është e patolerueshme një gjuhë e tillë e urrejtjes nga ministri në fjalë. Është e pakuptimtë se si një deri sot koleg i yni shprehet me aq injorancë, urrejtje dhe fyerje për viktimat e Reçakut, viktimat e tjera të regjimit të Millosheviçit dhe akceptimin dhe miratimin që ai i bëri terrorit të këtij regjimi. Kjo nuk arsyetohet. Në Qeverinë që unë e drejtoj nuk do të ketë vend për askë që në çfarëdo mënyre fyen të tjerët në bazë etnike, racore, fetare apo tjetër, e as ata që synojnë të akceptojnë politikat e tilla. Vendimi hyn në fuqi menjëherë”.
Kujtojmë se më parë, Haradinaj shkarkoi zëvendësministren e Drejtësisë, Vesna Mikiç, e cila deklaroi se bombardimet e NATO-s mbi caqet e ish-Jugosllavisë ishin gjenocid ndaj shtetit dhe popullit serb.
LEXO EDHE: Ministri serb i Kosovës: Shqiptarët terroristë, të prirur për gjak
