Jo vetëm festa për titullin e fituar, kurorëzuar me një tregolësh. Ndeshja kundër Monakos, për Mbape do të mbahet mend edhe për një shpejtësi të jashtëzakonshme. Sulmuesi i Paris Sën Zhërmenit ka vrapuar aq shpejt sa të gjithë kanë nisur krahasimet me Usain Boltin, rekordmbajtësi i 100 metrave me 9″58. Në këtë rekord, sprinteri xhamajkan arriti një shpejtësi mesatare prej 37.58 km/h, që është më e ulët sesa ajo që arriti lojtari i Kombëtares franceze, në aksionin që solli golin e parë.
Në fakt, krahasimi mes të dyve nuk është i barabartë. Bolt në rekordin e tij të regjistruar në Botërorin e vitit 2009 në Berlin, nisej nga piketat dhe arrinte një shpejtësi prej 44.72 km/h. Por gjithsesi koha e Mbapes prej 38 km/h mbetet e jashtëzakonshme për një sportist që nuk kryen një stërvitje të një disipline specifike.
