OPINION

Përrallat e 1 prillit dhe grabitja e 9 prillit

07:40 - 26.04.19 Fatos Çoçoli
GSH APP Download on Apple Store Get it on Google Play

Më qëlloi dje rastësisht në një kafene të kap një bisedë plot ngjyrë të dy bashkëqytetasve të mi: “A e din”,-i drejtohej më i moshuari tjetrit, me pasion dhe me zë të lartë, pa u shqetësuar se e dëgjonin të gjithë aty rrotull, ”Rama dhe Lleshaj e kanë organizuar grabitjen në Rinas. Po, ore po. Kjo bo mu, a s’e kupton? Janë 6 milionë e gjysmë euro, o vlla! Punë sekondash, kanë vjedh si nëpër filmat e Hollivudit. Fiks aq pare u duhen për fushatë në qershor, për zgjedhjet. Shtatë milionë euro na kushton fushata, ka thënë Saje qorri(i referohej ish-ministrit të brendshëm). Dhe ja ku dolën!”. Unë me një shokun tim që ishim ulur aty ngjitur pamë njeri-tjetrin në sy, por nuk folëm. Grabitja e 9 prillit në Rinas në barkun e avionit tek ne ka ndezur përfytyrimet e qytetarëve të thjeshtë. Hamendësimet, të ushqyera bollshëm nga një propagandë e shfrenuar partiake, janë nga më të bollshmet. Zgjerimi i rrethit të të përfshirëve në grabitje në Elbasan dhe Fushë-Krujë nuk i ka zbehur aspak teoritë kospirative të qytetarëve. Madje ka edhe gazetarë që duken të bindur se shteti ka dorë në të(?!). Edhe pse çfarëdolloj segmenti shtetëror që mund të përfshihej(Ministria e Brendshme, policia, SHISH, SHIK e me radhë), të vetmin interes në vjedhje do ta kishte patur të mos ishte grabitja kaq spektakolare. Pra, të punësuarit në shtet të vidhnin butë-butë, komodë, pa shkëmbim zjarri me policinë. Kushdo që nga shteti do të donte të planifikonte një vjedhje të tillë, do ta kishte bërë jo në stilin hollivudian.




Pse kush punon në shtet, e di mirë që nuk kapet kur vjedh pa zhurmë. Zhurma, spektakli me grabitje, është armiku numër një i vjedhësit nga brenda shtetit. Dhe sigurisht që ata në segmentet e shtetit që mund të ishin përfshirë, i kishin të gjitha mundësitë ta bënin grabitjen pa zhurmë. Kush punon në shtet, di si ta bëjë këtë gjë. Prandaj është armata e të korruptuarve tanë në zyrat e Shtetit. Megjithatë, armata mediatike baltëhedhëse, e gatshme për veprim solli skenarë të prodhuara nga mendje të sëmura dhe haluçinante(që fantazinë e tejskajshme e marrin për realitet). Dhe kështu u politizua deri në rrënjë të flokëve edhe grabitja e shekullit. Dora e shtetit në një grabitje keqbërësish të rëndomtë, edhe pse mirë të organizuar, ngjan më shumë me përrallat e 1 prillit. Mirëpo, armata e “shpif, shpif se diçka ngelet” i hodhi katapultat e radhës. Dhe me politizimin e ngjarjes, rritet dëmi që i bëhet sistemit tonë bankar. Ngrihet një imazh i rremë sikur bankat janë vegla dhe masha të politikës së sotme (sidomos të qeverisjes). Sikur shteti mund fare lehtë të vërë dorë mbi depozitat e qytetarëve që administrohen nga bankat tregtare në vend, sa herë ai është i aftë të lidhet me bandat kriminale. Kjo fantazi e sëmurë dëmton sigurinë e sistemit tonë bankar dhe politika, për interesat e saj dritëshkurtra, po tregohet fare e papërgjegjshme. Guvernatori i bankës sonë qendrore, Bankës së Shqipërisë bëri mirë që sqaroi se siguria e vlerave monetare i takon sistemit për sa kohë këto vlera qëndrojnë brenda tij, pra tek bankat tregtare. Kur vlerat monetare, paratë lëvizin, siguria është përgjegjësi e institucionit që garanton lëvizjen e tyre. Prej këtej, është mirë të kuptohet që grabitja në bark të avionit nuk ka të bëjë me sa i sigurtë apo i pasigurtë, sa i mbrojtur apo i pambrojtur është sistemi ynë bankar. Ai, sikurse e theksoi edhe vetë Guvernatori i BSH-së është i sigurtë, pse i mirëkapitalizuar(shprehje për të thënë se bankat janë plot me para. Dhe vërtetë ashtu janë, pse mbajnë 7.9 miliardë euro depozita të qytetarëve tanë). Kuptohet që kur vjedhjet dhe grabitjet e parave të bankave shtohen në numër dhe raste, sistemi bankar preket edhe ai. Për momentin, grabitja e shekullit ka dëmtuar imazhin tonë si vend i sigurtë për investime dhe për këtë, duhet të shqetësohemi e të punojmë që të gjithë, si institucione dhe opinion publik dhe media, që të japim kumtet e një vendi të sigurtë, sikurse realisht jemi. Grabitjet e stilit hollivudian, të amplifikuara nga politika, vetëm sa na dëmtojnë në interesin tonë kryesor, në rritjen e pranisë së investimeve të huaja tek ne. Për këtë duhet të punojmë, dhe jo për të ushqyer fantazitë e sëmura, qoftë edhe të politikanëve tanë. Sa për qytetarët, ata është e natyrshme të kenë skenarë hipotetikë, duke u ushqyer çdo ditë nga propaganda e sëmurë e partive tona të papërgjegjshme politike.


Shfaq Komentet (0)

Shkruaj nje koment

Your email address will not be published. Required fields are marked *

* *

This site uses Akismet to reduce spam. Learn how your comment data is processed.