Sezoni në kampionatin italian është në momentin vendimtar për të vendosur se cila nga skuadrat do të marrë pjesën në Ligën e Kampionëve sezonin e ardhshëm. Në lojë janë disa ekipe, mes tyre edhe Roma. Viti i verdhekuqve nuk ka qenë në nivelet e pritura në fillim sezonit, çka solli më pas shkarkimin e trajnerit Eusebio Di Françesko.
Postin e tij e zuri një njohje e vjetër si Klaudio Ranieri. Megjithatë, tekniku duket se nuk do të jetë pjesë e skuadrës për sezonin e ardhshëm, edhe nëse ekipi ia del të kualifikohet në Champions League. Në këtë formë drejtuesit romanë janë vënë në kërkim të trajnerit të ri, ndërsa informacionet e fundit në Itali flasin për kontakte që zgjasin prej 4 muajsh të klubit kryeqytetas me Antonio Konten. Ish-trajneri i Italisë dhe Juventusit duket se është i gatshëm të nisë sërish punë në Serinë A. 49-vjeçari duket se është i gatshëm të marrë përsipër drejtimin e ekipit, por kërkon një program ambicioz. Për Konten ka gjithashtu interesim edhe nga klube të tjera, teksa Interi mbetet i vëmendshëm ndaj situatës. Por, duket se është Roma që udhëheq garën, pasi kontaktet kanë nisur prej kohësh.