Aktualitet

Informaliteti/ Tatimet, letër 13 mijë bar-restoranteve: Korrigjohuni!

13:50 - 14.05.19 Gazeta Shqiptare

Drejtoria e Përgjithshme e Tatimeve u bën thirrje bizneseve, saktësisht sektorit të bar-restoranteve, pasi secili prej tyre që ka marrë një letër të personalizuar, ka të listuar faktorët e riskut, të identifikuar sipas deklarimeve që janë bërë. “Ju bëjmë me dije se tani është momenti për të reflektuar ndaj atyre treguesve, të cilët analiza e riskut i konsideron të papërmbushura në zbatim të ligjit. Kjo praktikë e re e ndërveprimit me tatimpaguesit, e asistuar ngushtësisht nga Fondi Monetar Ndërkombëtar, mbështetet në vlerësimin analitik të të dhënave tuaja, të cilat konsiderohen jo të sakta dhe kanë nevojë për përmirësim”, – thuhet në letrën e Tatimeve. Ndërkohë që janë lëshuar këto njoftime, administrata tatimore po monitoron reagimin në ndryshimin e këtyre të dhënave. Monitorimi i deklarimeve do të vijojë të bëhet automatikisht nga sistemi kompjuterik, i cili filtron të dhënat mbi bazën e analizës së riskut. Kjo praktikë përjashton çdo mundësi manipulimi apo keqpërdorimi të tagreve ligjore të punonjësve të administratës tatimore. “Qëllimi i këtij procesi nuk është të penalizojmë, por t’ju bindim përmes fakteve, që ju vetë të ndërgjegjësoheni dhe të pasqyroni me vërtetësi aktivitetin tuaj. Ky komunikim përmes letrës së personalizuar që ju ka mbërritur tashmë, përmbyll fazën e parë të planit sektorial të bar-restoranteve, i cili do të vijojë me dy faza të tjera, sipas skedulit të miratuar në bashkëpunim me FMN-në”, – thuhet në letër



Letra
Administrata tatimore u ka nisur nga një letër bar-restoranteve ku i vë në dijeni për problematikat që duhet të korrigjojnë. “I nderuar tatimpagues nga sektori i bar-restoranteve! Secili prej jush që ka marrë një letër të personalizuar, ka të listuar faktorët e riskut, të identifikuar sipas deklarimeve tuaja. Ju bëjmë me dije se tani është momenti për të reflektuar ndaj atyre treguesve, të cilët analiza e riskut i konsideron të papërmbushur, në zbatim të ligjit”, – thuhet në njoftimin e tatimeve. Sipas Tatimeve, ky komunikim përmes letrës së personalizuar që ju ka mbërritur tashmë, përmbyll fazën e parë të planit sektorial të bar-restoranteve, i cili do të vijojë me dy faza të tjera. Ndërkohë, 85 inspektorë të shërbimit të tatimpaguesve dhe të kontrollit nga zyra, janë trajnuar mbi specifikat e punës së tyre, në kuadër të këtij plani operacional. Këta inspektorë do të trajtojnë tatimpaguesit me risk të mesëm e të lartë. Kjo praktikë pune synon që përmes vlerësimit analitik të të dhënave të subjekteve dhe intervistave të thelluara me tatimpaguesit e riskut të mesëm e të lartë, të arrihet ndryshimi i deklarimeve të tyre drejt përmbushjes vullnetare. “Për çdo sqarim dhe asistencë që mund të keni nevojë, mos hezitoni të na kontaktoni në numrin e gjelbër 0800 14 14 ( 8:00 – 16:30, nga e Hëna në të Enjte, dhe 08.00-14:00 ditën e Premte), apo pranë çdo sporteli shërbimi të tatimeve, më pranë jush”, – thuhet në letrën e Tatimeve.

Shfaq Komentet (0)

Shkruaj nje koment

Adresa juaj email s’do të bëhet publike. Fushat e domosdoshme janë shënuar me një *

* *