Kryetari i Forumit Eurosocialist të Shqipërisë, Eljo Hysko ka marrë mandatin e deputetit. Në seancën e nesërme paralamentare ai do të betohet se bashku me tre depuetetë të rinj të Partisë Socialiste. Hysko, zv/ministrja e Shëndetësisë Adriana Jaku, Ardit Konomi dhe Florenc Spaho kanë marrë mandatet e deputetëve ditën e sotme nga KQZ.
Pas lënies së mandatit nga 4 deputetë, të cilët do të garojnë për kryetar bashkie në zgjedhjet lokale të 30 qershorit, mandatet e tyre i marrin emrat që pasonin listat e Partisë Socialiste në qytetet përkatëse.
Në këtë mënyrë, Eljo Hysko merr mandatin e Rakip Sulit që kandidon për Bashkinë e Kamzës, Adriana Jaku ka marrë mandatin e lënë nga Pjerin Ndreu, që kandidon në Lezhë, Ardit Konomi mandatin e Ilir Xhakollit, që do të garojë për bashkinë Pogradec, ndërsa Florenc Spaho të Nuri Belbës i cili kandidon në Prrenjas.
