Deputetë të Partisë Socialiste, asaj Demokratike si dhe Lëvizjes Socialiste për Integrim kanë marrë mandatin sot në Parlament. Një nga deputët e ardhur nga listat e PD, Erion Piciri ka kërkuar fjalën pas interpelancës së ministres së drejtësisë Etilda Gjonaj.
Në fjalën e tij, deputeti Piciri, kërkoi nga kryesuesja e seancës të fusë në axhendë një fjalim mbi krizën politike. “Merreni si kërkesë se nuk e di mirë si funksiojnë procedurat këtu, por merreni me seriozitet”, u shpreh ndër të tjera Piciri.
Në përgjigje të tij, nënkryetarja Hysi, i sqaroi deputetit të ri në Kuvend se si funksionojnë seancat plenare.
“Z.Piciri, mëqë jeni deputet i ri, ju përshëndes e ju uroj mbarësi. Është një nga kërkesat, që drejtuesi ju përshëndet” tha Hysi.
Nga radhët e opozitës deputët që morën mandatin janë Halil Valteri, Selami Jenisheri si dhe Besnik Troplini. Nga radhët e LSI-së, bën betimin si deputet Vasil Sterjovski, Edmond Stojku, Suzana Topi.
Ndërkohë zgjedhjet vendore, kanë nxjerrë jashtë parlamentit 4 deputetë socialistë, të cilët do të garojnë në procesin zgjedhor të 30 qershorit.
Kështu në seancë plenarë morën zyrtarisht mandatin duke kryer betimin, Eljo Hysko i cili merr mandatin e Rakip Sulit që kandidon për Bashkinë e Kamzës, Adriana Jaku zë vendin e lënë bosh nga Pjerin Ndreu, të cilit PS i ka besuar Bashkinë e Lezhës.
Po ashtu si deputet i ri në Kuvend u betua sot edhe Florenc Spaho i cili merr mandatin e Nuri Belbës që kandidon në Përrenjas, si edhe Ardit Konomi merr mandatin e Ilir Xhakollit, i cili më 30 qershor do të kandidojë për Bashkinë e Pogradecit.
