Minatorët, naftëtarët dhe metalurgët do të përfitojnë ulje të moshës së daljes në pension dhe rritje të përfitimeve. Drafti është diskutuar në Komisionin e Ekonomisë. Kreu i Komisionit të Ekonomisë dhe Financave, Arben Ahmetaj, ka bërë të ditur përfitimet shtesë të profesioneve të veçanta, minatorët, naftëtarët dhe metalurgët. Ky projektligj synon të mbulojë me përfitim përpara mbu-shjes së moshës për pension dhe përfitime shtesë mbi ato që akordohen në ligjin aktual për këto tri kategori.
“Së pari, mosha e daljes në pension parashikohet: për minatorët 55 vjeç, ose 10 vite para moshës ligjore të daljes në pension; për naftëtarët dhe metalurgët 60 vjeç, ose 5 vite para moshës ligjore të daljes në pension. Së dyti, parashikohet një shtesë mbi pension për minatorët, 1% të pensionit të pleqërisë për çdo vit pune në nëntokë dhe për naftëtarët e metalurgët 0,6% e pensionit për çdo vit pune në këto profesione. Bazuar në vjetërsinë e punës, minatorët përfitojnë një shtesë mbi pension minimalisht 12.5% dhe naftëtarët e metalurgët 12%. Në terma absolutë për pensionistët aktualë, kjo shtesë llogaritet në 2900 lekë në muaj, kurse për ata të rinj, edhe 1400 më tepër, si rezultat i uljes së moshës së daljes në pension. Së fundi, koeficienti i kthimit të kontributeve është 340% për minatorët, 157% për naftëtarët dhe metalurgët. Pra, për çdo lek kontribut, minatorët përfitojnë 3.4 lekë dhe naftëtarët e metalurgët 1.57 lekë”, – sqaron ish-ministri i Financave, Arben Ahmetaj, në një status në ‘FB’.
