Theresa May ka dhënë dorëheqjen. Ajo do të qëndrojë në detyrë deri më 7 qershor, duke i hapur rrugën garës për të zgjedhur një kryeministër të ri në Mbretërinë e Bashkuar.
Në një deklaratë emocionale në Downing Street, May tha se ajo kishte “bërë maksimumin” për të zbatuar rezultatin e referendumit të Brexit.
“Kam bërë më të mirën time. Kam bërë gjithçka që të bindja deputetët që ta mbështesnin atë marrëveshje…fatkeqësisht nuk arrita të siguroj mbështetjen e tyre. Është dhe do të jetë gjithmonë një trishtim i madh për mua që nuk arrita të përfundoj procesin e Brexit”, u shpreh May.
Gati në lot dhe e prekur, May u shpreh se ishte krenare që i kishte shërbyer vendit të saj.
Ajo u shpreh se ishte nder të ishte kryeministre dhe shpresonte se ajo nuk do të ishte gruaja e fundit që do të udhëheqë vendin.
Theresa May ka qenë kryeministre e Britanisë për pothuajse tre vite.