AKTUALITET

Publikoi përgjimet, flet gazetari: Materialet të besueshme, burimet janë shqiptare

10:16 - 06.06.19 Gazeta Shqiptare
GSH APP Download on Apple Store Get it on Google Play

Gazetari Peter Tiede, i cili tronditi politikën shqiptare me publikimin në të përditshmen gjermane ‘Bild’ të 6 përgjimet e reja nga dosja 339/1 tha se materialet janë të vërteta, nuk ka mashtrime dhe të gjitha materialet janë testuar.




Në një intervistë për emisionin “Opinion”, Tiede u shpreh se “burimet janë absolutisht të besueshme, janë burime shqiptare që na janë vendosur në dispozicion nga Tirana.

Në 6 përgjimet e publikuara një ditë më parë në të përditshmen gjermane ‘Bild’ dalin lidhjet direkte që Astrit Avdylaj, kreu i grupit, mbante me kryetarin e Bashkisë së Durrësit Vangjush Dako, por dhe me kandidatin aktual të Partisë socialiste për Bashkinë e Shijakut Elton Arban. Gjithashtu Avdylaj angazhohej për të siguruar vota për Partinë Socialiste dhe një prej kandidatëve të saj, deputetin aktual Ilir Ndraxhi.

Intervista e plotë:

Përgjimet audio që ju keni publikuar ne Bild kanë shkaktuar një furtunë të vërtetë ne Shqipëri. Herën e parë disa persona nga mazhoranca ju akuzuan si te paguar nga opozita.

Kjo është totalisht marrëzi, pakuptim. Unë jam një gazetar gjerman, jetoj në një vend të lirë dhe tek ne, gazetarët paguhen nga punëdhënësit e tyre dhe ky punëdhënës quhet Bild dhe jo opozita shqiptare. Unë madje, nuk njoh fare dikë nga opozita shqiptare.

A mbani ju përgjegjësi për autenticitetin e këtyre përgjimeve? Sepse në një situatë krize si kjo që po kalon Shqipëria kjo mund të konsiderohet si një goditje e fortë.

Ky është material i vërtetë, nuk ka mashtrime ne e kemi testuar këtë material ashtu siç veprojnë, pra bëjmë gjithmonë me informacionet. Burimet janë absolutisht të besueshme, janë burime shqiptare që na janë vendosur në dispozicion nga Tirana.

Si gazetar me eksperience a mendoni se publikimi i këtyre përgjimeve do te ndikojë në qëndrimin zyrtar të Gjermanisë ndaj Shqipërisë dhe hapjes së negociatave.

Nuk mendoj se kjo është diçka që domosdoshmërish do të mund të ndryshojë qëndrimin e Gjermanisë, pasi për Gjermaninë ka rëndësi që Shqipërisë të mos i ndodhë e njëjta gjë si me Malin e Zi, që ndikohet nga rusët. Pra dhe ajo të mos ndikohet nga Turqia. Të gjithë duan ta kenë për vete Ballkanin, por për Gjermaninë rëndësi ka gjendja aktuale në të cilën ndodhet Shqipëria, me korrupsionin e madh që ka, me mungesën e lirisë së shtypit, me mungesën e gjykatave. Juve nuk kene madje as gjykatë kushtetuese. Me të gjitha këto Shqipëria kërkon ose përpiqet të anëtarësohet në BE.  Ky është rasti aktual.

Si mendoni se duhet të reagojë qeveria shqiptare në një rast të tille? A keni patur raste të ngjashme dhe si është proceduar më vonë

Qeveria shqiptare ndoshta nuk ka se si të mund të reagojë ndryshe, përveçse të pretendojë se gjithçka është një mashtrim apo një konspirim I madh. Ndërmjetësuesit ndërkombëtarë dhe ata gjermanë thonë krejt hapur dhe qartë që Shqipëria e ka humbur luftën. Aty qeveris mafia. Pra politika duhet ta ketë të qartë se çdo të thotë dhe çfarë është mafia. Në fakt ajo vetë është mafia.

Këto shkrime ishin të planifikuara apo erdhën si reagim pas shkrimit të parë per Shqipërinë?

Pasi qeveria juaj pretendoi se unë jam blerë dhe gjithçka është mashtrim, vendosëm të vazhdonim kërkimet dhe të vërtetonim se neve nuk na ka blerë askush dhe të gjitha këto informacione janë të vërteta.

Është e kotë t’ju pyes për burimet e përgjimeve, por në Shqipëri ka dyshime dhe deklarata politike që një pjesë e tyre janë pjesë e dosjeve që janë tek krimet e rënda. I jeni referuar më së shumti burimeve shqiptare apo atyre gjermane?

Burime shqiptare. Prej andej e ka origjinën materiali. Materiali është i pranishëm edhe ne gjermanisht. Por siç e thashë, ai vjen nga Shqipëria dhe unë e kam marr nga Shqipëria

Ka shume ish oficerë policie në Shqipëri që kanë investiguar raste të implikimit të drejtuesve politikë me çështje korrupsioni, të cilët tashmë kanë kërkuar ose kërkojnë azil politik në vende të tilla si Holanda, Zvicra apo vendet skandinave

Kjo është një pyetje interesante, përse duhet të përndiqen policë shqiptarë? Ju e njihni rastin e Saimir Tahirit apo të policëve nga Vlora, të cilët duhet të arratiseshin në Zvicër. Mund të marrim edhe rastin e policëve të tjerë që kanë ikur në Holandë apo të drejtorëve të klinikave spitalore të cilët kanë qenë të detyruar që të japin (lëshojnë) raporte mjekësore për krimineltët, me qëllim që këta bosë të drogës apo të mafias të dalin nga burgu. Përse duhet të arratisen këta njerëz? Përse përndiqen ata në Shqipëri? Dritan Zagani, apo policë të tjerë kanë qenë në burg pa një padi. Policët kanë qenë në arrest shtëpie dhe duhet të arratiseshin nga Shqipëria, pasi kanë dalë kundër politikës. Neve personalisht këto audio nuk na nevojiten, por mendoj se nevojiten për kolegët shqiptarë dhe për policët e guximshëm që kanë vepruar në mënyrë të tillë, që ato të publikohen.

Në përgjimet tuaja janë përmendur shumë emra te njohur. Si keni menduar të përballeni me ta në rast se do t’i drejtohen gjykatës?

Uroj dhe shpresoj që ta bëjnë këtë gjë, pasi kështu do dalin në gjyq dhe ne do të paraqesim provat. Edhe unë vlej si provë, sigurisht. Kështu gjykatësit do të vërtetojnë nëse unë gënjej dhe nëse ju në Shqipëri qeveriseni nga një mafia e korruptuar. Unë e di që kam të drejtë.


Shfaq Komentet (0)

Shkruaj nje koment

Your email address will not be published. Required fields are marked *

* *

This site uses Akismet to reduce spam. Learn how your comment data is processed.