Bllokohen valët në mënyrë që kopjimi i nxënësve në provim të jetë i pamundur. Kjo masë është marrë në Kosovë për të garantuar një proces sa më të drejtë të zhvillimit të provimeve.
Maturantët e Kosovës do t’i nënshtrohen pjesës së parë të provimit të maturës nga data 12 deri më 15 qershor në lëndët gjuhë shqipe dhe gjuhë angleze, ndërsa pjesa e dytë e provimit do të mbahet nga data 19 deri më 22 qershor në matematikë dhe në lëndën me zgjedhje.
Masa ndëshkimi parashikohen për maturantët dhe administratorët e testit nëse zihen duke kopjuar, ndërkohë që zhurmues të valëve të telefonit do të vendosen në të gjitha qendrat e testimit.
Kryetari i Komisionit Shtetëror të Maturës, Fehmi Hysenaj tha se janë ndërmarrë të gjitha masat e nevojshme për të siguruar një administrim të mirë të testimit.
Ai tha se në qendrat e testimit do të vendosen zhurmues të valëve, në mënyrë që të parandalohet që testi të shpërndahet në rrjetet sociale.
“Jemi në procedurë e sipër që të sigurojmë që valët e telefonit ose zhurmuesit e valëve të vendosen në secilën qendër të testimit. Por, edhe një që duke u konsultuar me zyrën ligjore besoj që shumë shpejt do të vendosim që arsimtarët të cilët janë pjesëmarrës në administrimin e testit do të kenë mundësi të humbin licencën, që lëshohet nga MASHT për shkak të keqpërdorimeve nëse ata zihen”, tha Hysenaj.
