Ish-eurodeputeti në PE dhe raportuesi për Shqipërisë, Knut Fleckenstain, gjatë një takimi në Bruksel me temë “Shqipëria dhe perspektiva e saj europiane” foli për situatën në vend. Ai u shpreh se është informuar me vendimin e Presidentit të Republikës së Shqipërisë, Ilir Meta, për çdekretimin e datës së zgjedhjeve dhe reagimet e shumta lidhur me këtë vendim, ndërsa ka thënë se ata duhet ta marrin seriozisht shqetësimin e tij për situatën që mund të dalë jashtë kontrollit.
“Kam lexuar që presidenti është i shqetësuar për situatën dhe se ajo mund të dalë jashtë kontrollit. Ne duhet ta marrim këtë seriozisht, edhe pse ne nuk na takon që të ndërhyjmë në politikën e brendshme të Shqipërisë”, ka deklaruar Fleckenstein.
Sakaq, ai u ka bërë sërish thirrje vendeve anëtare që të çelin negociatat për Shqipërinë. Por, Knut Fleckenstein shton se vendet anëtarëve të Bashkimit Eurupian nuk u takon të ndërhyjnë në politikën e brendshme të Shqipërisë. Raportuesi për Shqipërinë shprehu edhe njëherë vlerësimin për reformat e ndërmarra në vendin tonë, duke u bërë thirrje edhe vendeve skeptike të votojnë pro hapjes së negociatave.
“Fatkeqësisht disa shtete anëtare nuk ndajnë qëndrimin e Parlamentit Europian dhe Komisionit Europian lidhur me hapjen e negociatave të anëtarësimit. Këto shtete duhet të njohin progresin e bërë dhe të hapin negociatat e anëtarësimit me Shqipërinë dhe Maqedoninë e Veriut”, deklaroi z. Fleckenstein.