Banka Botërore ka bërë një vlerësim të ecurisë së projektit të sigurisë së digave, që ka vite që zbatohet me fokus te hidrocentralet në kaskadën e Drinit. Në raportin e saj, BB ka nënvizuar se zbatimi konsiderohet i kënaqshëm, ndërkohë që ka ndryshuar në anën pozitive progresin e përgjithshëm. Deri më tani, sipas shifrave të dhëna në raport janë disbursuar 48 milionë dollarë nga kreditë që janë dhënë për këtë projekt. “Punimet në njësinë e fundit të mbetur, numër 4, në hidrocentralin e Komanit janë finalizuar dhe kompletuar. Certifikata e kompletimit për këtë njësi u lëshua nga KESH në 4 mars 2019, me një sërë elementesh të tjera në proces, që pritet të finalizohen nga kontratori në linjë me angazhimet kontraktuale. Pagesat e fundit të kontratës do të bëhen brenda vitit fiskal 2019, çka do të rrisë edhe nivelin e disbursimeve. Punimet rehabilituese elektromekanike për hidrocentralin e Komanit, më i madhi hidrocentral në Shqipëri, u kompletuan plotësisht në mars 2019”, vlerëson BB. Nga ana tjetër, i njëjti raport nënvizon se rinovimi dhe rehabilitimi i të gjitha njësive ka rritur fuqinë e hidrocentralit.
“Siguria e njësive është e lartë dhe përftimi nga operimi i kaskadës gjatë situatave të mira hidrike është domethënës si dhe efiçenca (rrjedhjet e ujit janë eliminuar dhe vlerësohen në disa gigavat humbje energjie gjatë një viti është ulur në zero). Pas mobilizimit fillestar dhe dizjenimin e projektit, punët në rehabilitimin e portave të shkarkimit kanë nisur në 10 prill 2019. Kontraktori është mobilizuar plotësisht në ekzekutimin e punimeve në dy hidrocentralet paralelisht. Meqë punimet në rehabilitimin e portave shkarkuese te të dy HEC-et janë në një fazë të hershme, një vlerësim më i detajuar i gjendjes së tyre aktuale do të bëhet në korrik 2019. Sapo inspektimet fillestare të finalizohen, KESH-it do t’i duhet të përgatisë një plan të rifreskuar”, nënvizon raporti. I njëjti detajon se janë tri kontrata aktive për asistencë teknike, ku dy të parat janë me afat deri në fund të projektit dhe që lidhen me kontratën e inxhinierit të projektit dhe panelin e ekspertëve kurse ajo për Menaxhimin Financiar të KESH është në fazë zbatimi. Dokumenti sjell në vëmendje edhe nismën e fundit të qeverisë për të miratuar vendimin mbi Bursën Shqiptare të Energjisë, duke e cilësuar këtë si një hap para për sektorin.
