Klubi i Lacios ka vendosur që të mos i përgjigjet pozitivisht ofertave për Thomas Strakoshën. Për portierin nuk kanë munguar ofertat tunduese, por në Romë janë të bindur se nuk kanë marrë ende maksimumin nga ai, ndaj çdo ofertë që do t’u vijë bardhekaltërve do të kthehet mbrapsht me një “jo, faleminderit”.
Sipas “La Gazzetta Dello Sport”, te Lacio besojnë verbërisht te aftësitë e Strakoshës dhe jo vetëm për faktin që Igli Tare e njeh që të vogël farë lidhjes miqësore që ka me babain e tij, Foto Strakoshën.
Portieri ka treguar në fushë se e meritonte vendin si titullar në këtë klub të rëndësishëm në Serinë A dhe me këto paraqitje ka bindur jo vetëm italianët, por edhe klubet angleze që janë vënë në ndjekje të tij. Arsenal e Uest Hem ishin skuadrat më ngulmuese, sipas të njëjtit burim, por Lacio ka vendosur që të mos largojë lojtarin duke i besuar atij edhe për të ardhmen në këtë projekt me Simone Inzagin në pankinë.
Edhe pse mendohet se ofertat mund të arrijnë shifra të rëndësishme, deri në 50 milionë euro, në klubin italian mendojnë se të zëvendësojnë Strakoshën do të jetë shumë e vështirë ndaj për këtë arsye do të refuzohet edhe këtë vit çdo lloj oferte që vjen për të.
