Deputeti socialist Pjerin Ndreu rezultoi i përfshirë në një nga audiopërgjimet e gazetës prestigjioze gjermane “Bild”.
Teksa bisedonte në telefon me Drini Gjecin, drejtor i Arsimit për rajonin e Dibrës, Ndreu i kërkoi atij t’i bëjë presion drejtorit të shkollës që të deklarojë hapur votën për Partinë Socialiste, përndryshe të hënën do të “fluturojë nga puna”.
“Komunikim normal në strukturat PS“, e quan Ndreu bisedën me drejtorin e arsimit. “Drejtorit të shkolles i lejohet ligjërisht të jetë pjesë në strukturat politike për ata që nuk e dinë këtë gjë dhe të votojë partinë ku aderon”, shkruan Ndreu.
Ndreu shkruan:
Përgjimet jane indicje por jo prova. Megjithatë meqë është përmend emri im, jam i detyruar t’u them se kominikimi im s’ka të bëjë me shitblerje, por me votat e një socialisti i cili normalisht duhet të votojë partinë e vet. Eshtë kominikim normal me strukturat tona. As nuk është i PD as i LSI që të quhet presion.
Nëse nuk lejohet t’u kërkohet vota nga ne socialistëve, atëherë është tjetër gjë. Përgjimi është një flluskë sapuni se u nis si shitblerje dhe u katandis në telefonata pune normale me socialistët. Drejtorit të shkolles i lejohet ligjërisht të jetë pjesë në strukturat politike për ata që nuk e dinë këtë gjë dhe të votojë partinë ku aderon!