Ekonomi

Bien çmimet e mallrave të importit, duhani dhe veshjet bëhen më të lira

11:16 - 07.09.19 Gazeta Shqiptare

Çmimet e produkteve industriale të importit janë ende në rënie. Të dhënat INSTAT-it treguan këtë javë se indeksi i çmimeve të importit ra me 0.8% në tremujorin e dytë të këtij viti. Për të katërtin vit radhazi, çmimet e importit po qëndrojnë në territor negativ, çka tregon për presione të dobëta inflacioniste nga jashtë. Rënia e çmimeve të importit fillimisht ka ardhur si rrjedhojë e çmimeve të ulëta të lëndëve të para dhe kërkesës ende të brishtë në tregjet botërore. Çmimet e importit të produkteve në seksionin “Industria përpunuese”, e cila zë peshën më të madhe në vlerën e importeve, ka shënuar ulje me 1.2%. Brenda këtij seksioni ulja më e madhe e çmimeve vërehet në produktet e aktivitetit “Prodhimi i produkteve të duhanit” me 8.0%, pasuar nga aktivitetet “Prodhimi i tekstileve” me 6.6%, “Prodhimi i makinerive dhe pajisjeve P.K.T” me 3.5% etj..



Nga ana tjetër, çmimet në aktivitetin “Përpunimi i koksit dhe rafineria e nënprodukteve të naftës” kanë shënuar rritje me 5.4%, pasuar nga grupi “Prodhimi i pajisjeve elektrike” me 4.7%. Indeksi i çmimeve të importit në tremujorin e dytë 2019 shënoi ulje me 0.6%, krahasuar me tremujorin e parë 2019. Indeksi në seksionin “Industria përpunuese”, e cila zë peshën më të madhe në vlerën e importeve ka shënuar ulje me 0.2%. Indeksi i çmimeve të importit mat ecurinë e çmimeve të transaksioneve të produkteve industriale të importuara për t’u shitur në tregun vendës. Dy vitet e fundit çmimet e mallrave të importit në tregun vendës kanë rënë për dy arsye. E para dhe më e rëndësishmja lidhet me mbiçmimin e monedhës vendëse, Lekut, ndaj Euros. Shqipëria është importues i mallrave të konsumit, ndaj dhe rënia e Euros i ka bërë më të lira mallrat e importit në tregun vendës. Arsyeja tjetër lidhjet me koniunkturën e çmimeve në tregjet ndërkombëtare. Ulja e çmimeve për artikuj të tillë si cigaret dhe veshjet reflektohen edhe në tregun vendës.

Shfaq Komentet (0)

Shkruaj nje koment

Adresa juaj email s’do të bëhet publike. Fushat e domosdoshme janë shënuar me një *

* *