Një incident i pazakontë ndodhi të shtunën në fillim të ndeshjes mes Francës dhe Shqipërisë. Teksa pritej të ekzekutohej himni shqiptar, u luajt ai i Andorras. Kaq mjaftoi që lajmi të merrte dhenë duke bërë një bujë të madhe në mediat ndërkombëtare si dhe në rrjetet e ndryshme sociale. Mirëpo, për të mos mjaftuar kjo, gafa u pasua edhe gjatë ndjesës së bërë nga organizatorët, të cilët i kërkuan falje Armenisë. Ndërkohë, mediat transalpine kanë zbuluar edhe arsyen e vërtetë pse ndodhi ngatërresa.
Sipas tyre, ishte faji i Federatës Franceze së Futbollit, e cila është përgjegjëse për organizimin e ndeshjeve. FIFA ka dërguar në ’email’ dy himne, për shkak se Franca pritet të luajë edhe me Andorrën më 10 shtator, teksa francezët vendosën himnin e gabuar, i cili shkaktoi jo pak polemika.