Në afro 20 muaj nga nisja e zbatimit të reformës në drejtësi më shumë se 100 gjyqtarë dhe prokurorë janë larguar nga sistemi. Kjo për shkak se ose kanë ngecur në rrjetën e vetingut, ose janë detyruar të largohet në mënyrë vullnetare pa pranuar që të kalojnë para Komisionit të Pavarur të Kualifikimit. Komiteti Shqiptar i Helsinkit ka publikuar gjetjet për procesin e vetingut nga momenti që ai ka filluar, ku nga 1 shkurti i vitit 2018 deri në fund të korrikut të këtij viti plotë 186 gjyqtarë e prokurorë kanë kaluar në sitën e vetingut.
Dhe sipas monitorimeve të kryera deri tani janë shkarkuar 60 gjyqtarë e prokurorë, të cilët nuk kanë kaluar dot sitën e vetingut. Ndërkohë që 37 të tjerë kanë dhënë dorëheqjen ose kanë dalë në pension, si një nga mënyrat për të mos u përballur me kontrollin e imtësishëm nga KPK. Kujtojmë se të dhënat janë deri në muajin korrik, ndërkohë që ky bilanc është shtuar edhe më gjatë këtij muaj ku ka pasur të tjerë të shkuar. Ndërkohë që e kanë mundur ta kalojë me sukses këtë proces pak më shumë se gjysma e gjyqtarëve dhe prokurorëve që janë përballur me vetingun. Më konkretisht Komisioni i Pavarur i Kualifikimit ka konfirmuar në detyrë 76 gjyqtarë e prokurorë. Ndërkohë që sipas studimit të Komitetit Shqiptar të Helsinkit interesant është edhe elementi që ka të bëj me arsyen pse këta gjyqtarë dhe prokurorë janë shkarkuar.
Kështu, numri më i madh i shkarkimeve nga detyra vjen për shkak se gjyqtarët e prokurorët kanë probleme me më shumë se një nga kriteret që përcakton ligji, pra mund të kenë pasur probleme pasurie, përgatitje profesionale apo besueshmërie dhe lidhje me elementë të dyshimtë apo me krimin. Sipas të dhënave plotë 37 gjyqtar dhe prokurorë janë shkarkuar për këtë arsye, pra se kanë pasur probleme në më shumë se një kriter. Më pas kriteri i pasurisë është ai që ka djegur më shumë magjistratë pasi 22 nuk e kanë kaluar vetingun pasi nuk justifikonin pasurinë. Kujtojmë këtu se shumë emra të gjyqësorit, përfshi anëtarë të Gjykatës Kushtetuese apo Gjykatës së Lartë janë shkarkuar nga vetingu pikërisht se pasuria që zotëronin ishte më e madhe se sa niveli i të ardhurave që ata kanë pasur në vite dhe në shumë raste ata nuk arritën ta justifikojnë atë me dokumentacionin përkatës. Një prej gjyqtarëve që mbeti në rrjetën e vetingut pikërisht për shkak të këtij kriteri ishte edhe ish-kryetari i Gjykatës së Lartë, Xhezair Zaganjori.
Kujtojmë se Zaganjori e kaloi shkallën e parë të vetingut në KPK dhe ngeci në shkallën e dytë pas ankimimit që bëri komisioneri. Ndërkohë që sipas të dhënave vetëm një magjistrat është penalizuar, sepse ka pasur probleme me pastërtinë e figurës. Nga ana tjetër shkalla e dytë e vetingut, Kolegji i Posaçëm i Apelimit ka shqyrtuar gjithsej 31 dosje. Nga këto në 18 raste, KPA ka lënë në fuqi vendimet e Komisionit të Pavarur të Kualifikimit, në 9 raste është ndryshuar vendimi i shkallës së parë të vetingut, është pushuar shqyrtimi në 3 raste, dhe në një rast është prishur vendimi. Kujtojmë se 62 janë çështjet që janë ankimuar në KPA si shkalla e fundit e vetingut për gjyqtarët dhe prokurorët. Gjithashtu rezulton se nga 60 subjektet e shkarkuara në KPK, 27 gjyqtarë prej tyre janë gjyqtarë, 22 prokuror, 5 anëtarë të Gjykatës së Lartë, 4 gjyqtarë të Gjykatës Kushtetuese dhe 2 ndihmës ligjorë. Ndërsa në 76 subjekte të konfirmuara nga KPK, 28 janë gjyqtarë, 35 prokurorë, 4 anëtarë të Gjykatës së Lartë, 2 gjyqtarë të Gjykatës Kushtetuese, 5 këshilltarë dhe 2 ndihmës ligjorë. Pra, siç shihet nga këto të dhëna rezulton se gjyqtarët janë më të korruptuar apo më problematikë në raport me ligjin se prokurorët. Kjo pasi në numrin total të të shkarkuar gjyqtarët janë më shumë, ndërsa në numrin total të atyre që e kanë kaluar vetingun janë prokurorë më shumë.
Rezultatet e vetingut në shifra
†186 vendime të dhëna nga KPK në gati 20 muaj
37 vendime të KPK për dalje në pension, ndërprerje apo dorëheqje
†60 subjekte të shkarkuara në KPK, nga të cilat 27 gjyqtarë, 22 prokurorë, 5 anëtarë të Gjykatës së Lartë, 4 gjyqtarë të Gjykatës Kushtetuese dhe 2 ndihmës ligjor.
†76 subjekte të konfirmuara nga KPK, nga të cilët 28 gjyqtar, 35 prokuror, 4 anëtarë të Gjykatës së Lartë, 2 gjyqtar të Gjykatës Kushtetuese, 5 këshilltar dhe 2 ndihmës ligjor.
†22 subjekte janë shkarkuar për shkak të mosjustifikimit të pasurisë, 1 për shkak të problemeve me besueshmërinë e figurës dhe 37 të tjerë janë shkarkuar për më shumë se një kriter.
†31 vendime të marra nga KPA, për të cilat 18 është lënë në fuqi vendimi i KPK-së, 9 është ndryshuar vendimi, 3 janë pushuar si çështje dhe 1 është prishur vendimi i mëparshëm.
†62 janë çështjet që janë ankimuar në KPA si shkalla e fundit e vetingut për gjyqtarët dhe prokurorët.
