Kthimi i Ilir Dajës dhe fillimi i një projekti të ri me të rinj që vlerësohen si shumë të talentuar, bashkuar me disa “veteranë” të mbetur nga sezonet e mëparshme, bëri që në Korçë të kthehet entuziazmi për Skënderbeun. Por ai ka zgjatur pak javë, pasi korçarët kanë treguar limitet që kanë në këto momente, me përgatitjen e filluar me vonesë dhe të rinjtë që u nevojitet kohë për t’u inkuadruar në lojën e ekipit. Për këtë është i ndërgjegjshëm edhe trajneri Ilir Daja, i cili insiston se të gjithë gabohen kur krahasojnë ekipin aktual me atë të deri dy viteve më parë, që dominonte në Shqipëri dhe shkëlqente në Europë. Në fjalët e tij për RTSH, Daja thekson se të gjithë duhet të harrojnë atë ekip, pasi Skënderbeu aktual nuk është më i tillë.
“Në këto dy ndeshjet e fundit kemi pësuar gola, nuk është mangësi vetëm e mbrojtjes, janë gola që kanë ardhur me pasime të humbura nga ne dhe nuk e prisja. Nuk jemi më Skënderbeu, ai i historisë së lavdishme të futbollit shqiptar dhe në Europë. Ai është cikël i mbyllur, nuk duhet ta paragjykojmë ekipin në atë nivel të lartë, por si të rindërtuar”, tha Daja. Skënderbeu i ri, duhet të tregohet i kujdesshëm ndaj çdo kundërshtari, edhe kur bëhet fjalë për një ndeshje Kupe ndaj një skuadre të kategorive inferiore. “Nuk e mendojmë Teutën, kemi ndeshje të mërkurën me Devollin dhe këto dy ditë do të përgatitemi për Devollin. Pastaj do të mendojmë për Teutën”, tha Daja.