Policia konfirmon se 34-vjeçari Kreshnik Dashi, është vrarë. Viktima e tij është gjetur mëngjesin e sotëm në Vlorë. Familjarët kanë qenë të parët që kanë dyshuar se bëhej fjalë për një vrasje, pasi në trupin e viktimës janë konstatuar shenja dhune në shpatull dhe në kokë. Ndërkaq policia ka konfirmuar se në trupin e viktimës ka pasur plagë plumbi në shpatull.
Njoftimi i policisë
Vlorë
Në lidhje me ngjarjen ku në orët e para të mëngjesit të sotëm u gjet një person i pajetë në afërsi të banesës së tij në lagjen “Kushtrimi”, ku nga veprimet paraprake rezultoi pa shenja dhune, ju informojmë se:
Pas hetimeve të mëtejshme, nga ekspertiza e plotë mjeko-ligjore, në trupin e 34 vjeçarit K.D, konkretisht në pjesën e pasme të shpatullës është konstatuar një plagë e cila dyshohet të jetë shkaktuar nga armë zjarri.
34 vjeçari punonte në një firmë këpucësh në qytetin e Vlorës dhe nga ana e Policisë nuk njihet si person me precedent penal.
Në Policinë e Vlorës është ngritur një grup i posaçëm hetimor me qëllim dokumentimin dhe zbardhjen e plotë të ngjarjes.
Vijojnë hetimet e mëtejshme në bashkëpunim me Prokurorinë për sqarimin e rrethanave dhe vendosjen para përgjegjësisë penale të autorit/ve.
