Dy shtetas shqiptarë janë arrestuar nga karabinierët në Varese. Ata ranë në pranga me akuzën për vjedhje të automjeteve dhe të apartamenteve nën kërcënimin e armëve. Të arrestuarit ishin pjesë e një bande të përbërë prej 4 personash, të gjithë me kombësi shqiptare.
Në bashkëpunim me zyrat e Policisë Gjyqësore Polaria në Malpensa, operacioni për arrestimin e pjestarëve të bandës ka nisur që në Shtator të vitit të kaluar.
Raportohet se personat kishin dy garazhe nëntokësorë, ku grumbullonin makinat e vjedhura me qëllim që vendndodhja e tyre të mos zbulohej nga sistemet satelitore.
Dy të arrestuarit akuzohen për vjedhjen e 5 makinave “Range Rover”, një makine të tipit “Jaguar F”, grabitje bizhuterish si dhe për vjedhje nën kërcënimin e armëve brenda shtëpive në provincat e Ravenna dhe Brescia.
Aksioni për kapjen e tyre u bë në momentin kur ata po vidhnin një Range Rover brenda një terminali. Në përpjekje për t’i shpëtuar policisë, automjeti u përmbys për shkak të shpejtësisë së madhe.