Drejtori i CIA-s, John Brennan, ishte në Tiranë në fund të dhjetorit të kaluar në një vizitë disa-orëshe dhe ajo që bëri përshtypje ishte se nuk e takoi ministrin e Brendshëm. Brennan takoi presidentin Nishani, kryeministrin Rama, shefin e SHISH, Ajazi Lika, ministren e Mbrojtjes, Kodheli dhe drejtorin e Përgjithshëm të policisë, Haki Çako. Nuk ishte shumë e qartë se pse CIA vendosi ta anashkalojë Tahirin, ndërkohë që zgjodhi të takojë vartësin e tij.
GSH.al thotë se mund të kenë qenë të shumta arsyet që CIA ka zgjedhur të mos vendosë kontakt me ministrin e Brendshëm. Ndoshta përfolja e tij nga opozita, aleatët e LSI, ish-vartësit si Zagani, lidhjet e supozuara nga (nga ana e PD) me eksponentë të botës së krimit, kanë vendosur të mos “e njollosin” vizitën e John Brennan në Tiranë.
Në mesazhin që shpërndau ambasada thuhej se në këto takime u fol për: “Një gamë çështjesh, përfshi sigurinë rajonale, bashkëpunimin kundër terrorizmit, shkëmbimin e informacioneve të inteligjencës, si dhe çështje të tjera dypalëshe”.
Vizita duket se ka qenë e shkurtër. Ka zgjatur pak orë dhe është mbajtur sekret. Pak minuta pas mesazhit që shpërndau Ambasada Amerikane, Ministrja e Mbrojtjes, Mimi Kodheli, shpërndau në profilin e saj në Facebook, fotot e para të takimit. Pa dhënë shumë detaje për biseden, Kodheli shkruan:
“Në Tiranë me drejtorin e CIA John O. Brennan për çështje të sigurisë rajonale, luftën kundër terrorizmit dhe marrëdhëniet e shkëlqyera Shqipëri-SHBA”.
I dyti që publikoi fotot ishte drejtori i Përgjithshëm i Policisë, Haki Çako.
Bashkëpunimi i Drejtorisë së Antiterrorit me CIA-n ka qenë një sukses sipas Haki Çakos, që në takim shoqërohej nga Gledi Nano, drejtori i Antiterrorit.
Një njoftim i shkurtër për mediat, i shoqëruar nga foto është publikuar edhe nga presidenti Bujar Nishani që në këtë rast ka qenë më i rezervuar për temen e bisedës.
Ra në sy fakti se nuk pati asnjë njoftim nga kryeministria, pavarësisht konfirmimit se takimi mes Ramës dhe Brennan ka ndodhur në ambjentet e kryeministrisë. Heshtja e kryeministrisë ishte në të njëjtën gjatësi vale me atë të Shërbimit Informativ të Shtetit.