Pas 4 viteve sherr, bojkot, përplasje, tension dhe thirrje për “revolucion” e “hedhje në Lanë” – politika e ka mbyllur legjislaturën në një atmosferë rozë. Të gjithë të qeshur, batuta, gaz e hare ishte peisazhi përmbyllës i Kuvendit 2013-2017.
Jo thjesht peisazh rozë, por Rama dhe Berisha kanë nisur të flasin me të njëjtën gjuhë: ata e lavdërojnë paktin PS-PD të 18 majit dhe thonë që “ka fituar Shqipëria dhe shqiptarët”.
Për ata që nuk e dinë, pakti i 18 majit: hoqi Fatmir Xhafajn dhe vuri Dritan Demirajn në ministrinë e Brendshme, hoqi Denar Bibën dhe vuri Klement Zgurin në KQZ , hoqi Igli Totzanin dhe vuri Erinda Ballancën tek Avokati i Popullit. Nëse kjo është “fitore e gjithë Shqipërisë”, ashtu qoftë. Dhe jo vetëm për një legjislaturë.
GSH.al ju sjell pamje nga seanca e fundit parlamentare ku jo vetëm Edi Paloka dhe Gramoz Ruçi u panë kokë më kokë, por deputetët e PS-së u entuziasmuan deri aty, sa duartrokitën Sali Berishën. Kjo është një magji, që vetëm profesioni i dytë më i vjetër në botë mund ta arrijë. Nëse s’besoni mund të shihni fotot.
GSH.al
Për të marrë lajmet e fundit të “Gazeta Shqiptare”, ndiq faqen tonë në Facebook.