Deputetja e Lëvizjes Socialiste për Integrim, Monika Kryemadhi e ftuar në emisionin e mëngjesit “Koha për tu zgjuar” në News 24 ka komentuar deklaratat e një ditë më parë nga përfaqësues të dy partive më të madha politike në vend. Sipas këtyre deklaratave, LSI nuk ka më asnjë shans për të qenë në qeverisje, por një gjë të tillë nënkryetarja e LSI i ka cilësuar qesharake dhe të shprehura në momente “paniku”.
Kryemadhi u shpreh se pavarësisht përpjekjeve, këto deklarata nuk e dëmtojnë elektoratin e LSI-së, që sipas saj është i vendosur për ndryshim. Deputetja e LSI tha se tashmë ka ardhur koha që “politikanët të lënë helmin e fushatës dhe të flasin për nevojat që shqiptarët kanë çdo ditë”.
Ku e sheh avantazhin e saj LSI?
Është një avantazh shumë i madh që LSI ka me listat dhe kandidatët e saj. Duhet t’i japim mundësinë të rinjve për ta drejtuar vendin, për të qenë në vendimmarrje.
Si është pritur kjo formulë me të rinjtë në elektorat?
E shoh që është pozitive. Njerëzit janë të lodhur nga politika, edhe vetë ne politikanët jemi të lodhur. Emra që kanë kandiduar disa herë, janë të lodhur edhe vetë. Po të shohësh fushatën e të rinjve, vihet re pozitiviteti që kanë, durimi e dëshira për të dëgjuar njerëzit dhe hallet që ata kanë. Kurse dy partitë e vjetra, njëri kryetar flet për karrierën e vet, e tjetri sesi pi kafe.
Çfarë kanë përfaqësuar tek programi i LSI këta të rinj?
Së pari është programi, i cili synon arsim dhe punësim për të rinjtë. Arsimi profesional është shumë i rëndësishëm. Me interes është krijimi i vendeve të punës për të rinjtë. Programi ynë është real dhe platformë e realizuar me kujdes.
Dje ka pasur disa deklarata të forta se LSI nuk ka më asnjë shans për të qenë në qeverisje. A e dëmton kjo elektoratin tuaj?
Këto janë deklarata përveçse qesharake, edhe të vendosura në panik. Këto nuk e dëmtojnë aspak elektoratin. Jam e bindur se nuk do guxojë njeri jo vetëm të prekë votën e shqiptarëve, por edhe ta deformojë atë. Askush nuk mund t’i ndalë të rinjtë që duan ndryshim që të dalin nga kjo situatë.