Maturantët në të gjithë vendin i janë nënshtruar ditën e djeshme provimit të tretë me detyrim, që është Matematika. Procesi nuk ka kaluar pa incidente, duke qenë se varianti A i tezës qarkulloi në rrjetet sociale gjatë kohës kur nxënësit ishin ende në provim. Ministria e Arsimit dhe Sportit garantoi siguri maksimale për këtë provim, por pavarësisht kësaj duket se nxënësit kanë mundur të fusin në sallat e provimit celularë e më pas të fotografojnë tezën. MAS nuk mbajti një qëndrim zyrtar për qarkullimin e tezës së Matematikës në rrjetet sociale. Ndërkaq, Agjencia Kombëtare e Provimeve ka publikuar skemën e vlerësimit për të gjitha shkollat e mesme, e më konkretisht për: gjimnazin, gjimnazin gjuhësor dhe profesionalet. Përmes kësaj skeme maturantët mund të orientohen mbi përgjigjet e sakta që duhej të kishin dhënë në provim. Por, ajo që bie në sy është fakti se është publikuar vetëm skema e vlerësimit për variantin A të tezës, ndonëse sipas rregullores, brenda ditës së provimit duhet të publikohen skemat e vlerësimit për të dyja variantet e tezës. Ndërkaq, “Gazeta Shqiptare” publikon sot përgjigjet e sakta, të cilat i gjeni bashkëngjitur shkrimit. Ky është provimi i tretë të cilit i nënshtrohen maturantët, pas atij të gjuhës së huaj dhe Gjuhës Shqipe e Letërsisë. Ndërkaq, më herët përfaqësues të AKP-së bënë me dije për “GSH” se përgjigjet e provimit të gjuhës së huaj me detyrim do të shpallen në datën 17 qershor. “Sipas rregullores, rezultatet duhet të shpallen 2 javë pas ditës së provimit. Nëse marrim parasysh që provimi u zhvillua në datën 5 qershor, atëherë praktikisht në datën 17 qershor duhet të ketë përfunduar korrigjimi. Ky afat nevojitet, pasi janë shumë maturantë të cilëve u korrigjohet testi. Janë 5 qendra korrigjimi dhe ne do të ndjekim procesin normal, që është korrigjimi 2-fish (double check), me një normë të caktuar ditore”,- u shprehën përfaqësuesit e AKP-së. Sipas tyre, procesi i korrigjimit bëhet nga mësues të certifikuar, ndërkohë që testet janë shpërndarë në mënyrë të tillë, që asnjë qendër të mos korrigjojë qytetin ku ajo është ngritur. “Ne nuk marrim mësues të cilët nuk janë trajnuar apo certifikuar. Ka masa shumë të rrepta për korrigjimin, pasi asnjë mësues nuk e di çfarë po korrigjon, sepse testet shpërndahen nëpër qendra dhe asnjë qendër nuk korrigjon testet e rrethit. Për shembull, nuk ndodh që Tirana të korrigjojë Tiranën. Asnjë mësues nuk e di cilin rreth korrigjon. Ky është parimi kryesor që kur bëhet ndarja e testeve: kemi shumë kujdes që në Shkodër të mos shkojë kurrë Shkodra, në Fier të mos shkojë Fieri, por të ketë një lloj përzierjeje. Kjo bëhet në mënyrë që të mos lindin dyshime në lidhje me cilësinë e korrigjimit”,- thanë përfaqësuesit e AKP-së.
