Ornela MANJANI
Procesi i aplikimit dhe ekzekutimit të vendimeve përfundimtare të vlerësuara financiarisht për vitet 1993, 1994 dhe 1995 është një proces i vazhdueshëm dhe i hapur për të gjitha subjektet. Të gjitha subjektet përfituese, ish-pronarë që janë përfitues sipas trungut familjar duhet të nënshkruajnë deklaratën noteriale, ku pranojnë se janë dakord me vendimin që ka dhënë ATP-ja. Agjencia e Trajtimit të Pronave bën të ditur se fton të gjitha subjektet e vendimeve përfundimtare të vlerësuara financiarisht që të paraqiten pranë zyrave të saj për të aplikuar, duke plotësuar dhe depozituar dokumentacionin përkatës, sipas kritereve të përcaktuara në VKM-në nr. 223 datë 23.03.2016 për “Përcaktimin e rregullave dhe të procedurave për vlerësimin dhe shpërndarjen e fondit financiar e fizik për kompensimin e pronave” (i ndryshuar). “Gjithashtu, njoftojmë se të gjitha subjektet, të cilat kanë aplikuar apo do të aplikojnë për ekzekutimin e vendimeve përfundimtare të vlerësuara financiarisht, do të trajtohen me kompensim vetëm pasi të ketë përfunduar shqyrtimi administrativ i kërkesës dhe i të gjithë dokumentacionit të depozituar nga ana e tyre”, – thuhet në njoftimin e Agjencisë së Trajtimit të Pronave. “Në ATP dorëzohet një deklaratë noteriale e nënshkruar nga subjekti i shpronësuar ose përfaqësuesi me prokurë i të gjithë trashëgimtarëve ligjorë të subjektit të shpronësuar, përmes së cilës subjektet vetëdeklarojnë nëse vendimi përfundimtar i kompensimit apo vlerësimi i tij është ankimuar apo jo në rrugë gjyqësore, si dhe nëse këto subjekte kanë qenë apo jo të paditur apo persona të tretë në proceset gjyqësore me objekt ankimin e vendimit për të cilin ata aplikojnë”, – thuhet në VKM nr. 223 datë 23.03.2016, të ndryshuar.
Aplikimi
Agjencia e Trajtimit të Pronave bën të ditur se të gjitha subjektet e interesuara, të cilat evidentojnë të meta apo pasaktësi në këtë regjistër të bërë publik nga ana e ATP-së mbi vlerësimin ekonomik të vendimeve për kompensim kanë të drejtë të plotësojnë dokumentacionin e munguar dhe të nevojshëm për vlerësimin brenda një afati prej 6 muajsh nga data e publikimit të regjistrit. Me kalimin e afatit ligjor 6-mujor për depozitimin e dokumentacionit shtesë të nevojshëm, Agjencia e Trajtimit të Pronës do të zbatojë parashikimet ligjore të përcaktuara për këtë kategori vendimesh përfundimtare për kompensim.
Dosjet
Agjencia e Trajtimit të Pronave ka mbyllur procesin e vlerësimit të vendimeve përfundimtare dhe ka njohur të drejtën e kompensimit për vitet 1993, 1994 dhe 1995. Numri i dosjeve të shqyrtuara arrin në 10,763. Ndërkohë, Agjencia e Trajtimit të Pronave vijon punën me dosjet e 1996-ës dhe sipas ligjit në fuqi, brenda një afati 3-vjeçar, ATP duhet të mbyllë vlerësimin ekonomik të 26 mijë vendimeve të formës së prerë, që janë të arkivuara në Agjenci.
Deklarata
MARRJE DIJENI MBI EFEKTET E FORMULARIT DHE DOKUMENTACIONIT TË PARAQITUR SIPAS KËRKESAVE NË KËTË FORMULAR
Unë, i nënshkruari _ kam marrë dijeni dhe jam i vetëdijshëm se:
- a) Ky formular përbën dokument zyrtar, që i drejtohet një organi shtetëror dhe i nënshtrohet verifikimit.
- b) Paraqitja e të dhënave të pavërteta, të pasakta ose fshehja e tyre sjell përjashtimin e menjëhershëm dhe në çdo kohë nga çdo procedurë e mëtejshme si dhe ka përgjegjësi penale sipas ligjit.
- c) Me plotësimin e këtij formulari kam dhënë pëlqimin dhe autorizoj ATP-në për verifikimin e plotë të çdo të dhëne, informacioni dhe dokumentacioni që shoqëron këtë formular.
ç) Trajtimi i të dhënave do të kryhet në përputhje me legjislacionin në fuqi për mbrojtjen e të dhënave personale.
Duke qenë i vetëdijshëm për pasojat ligjore në rast të vetëdeklarimeve të pavërteta, të pasakta ose fshehjen e tyre konfirmoj saktësinë e të dhënave të pasqyruara në dokumentacionin e paraqitur sipas kërkesave në këtë formular.
KUJDES: JENI I/E SIGURT? SUGJEROHET QË NËNSHKRIMI I KËTIJ SEKSIONI TË BËHET PASI ËSHTË PLOTËSUAR SAKTË I GJITHË FORMULARI.
____ (emër, mbiemër, nënshkrimi)”.
Dokumentet që duhet të dorëzojnë pronarët
- Dokument identifikimi.
- Konfirmim nga ZVRPP përkatëse mbi gjendjen juridike të pronës që kompensohet dhe nëse është ushtruar apo jo e drejta e parablerjes.
- Deklaratë noteriale e nënshkruar nga subjekti i shpronësuar/përfaqësuesi me prokurë, përmes së cilës subjektet vetëdeklarojnë nëse vendimi përfundimtar i kompensimit apo vlerësimi i tij është ankimuar apo jo në rrugë gjyqësore, si dhe nëse këto subjekte kanë qenë apo jo të paditur apo persona të tretë në proceset gjyqësore me objekt ankimimin e vendimit për të cilin aplikojnë.
- Deklaratë noteriale e nënshkruar nga subjekti i shpronësuar/përfaqësuesi me prokurë i të gjithë trashëgimtarëve, përmes së cilës subjektet vetëdeklarojnë nëse kanë përfituar apo jo nga dispozitat e ndarjes së tokës bujqësore.
- Dëshmi trashëgimie, nëse ka ndryshuar rrethi i trashëgimtarëve.
- Prokurë e nënshkruar nga të gjithë trashëgimtarët e ligjshëm, ku si tagër i nevojshëm të jetë dhe e drejta për të tërhequr vlerën financiare në emër të tyre.
- Vërtetim për numrin e llogarive bankare.
- Mandatpagese.