Egla XHEMALI
E bukur dhe e zgjuar është prerja fatale”, rrëfen modelja bukuroshe, që me sa duket i gëzon të dyja virtytet. Atalanta është shumë ndryshe nga koleget e saj. Modelingun e ka nisur shumë herët, ndaj i ka të shumta kurorat kombëtare dhe ndërkombëtare, por mbi të gjitha i ka këmbët në tokë. Sapo ka përfunduar studimet për arkitekturë, sepse për bukuroshen, një modele duhet edhe të shkollohet. Në intervistën dhënë për “Bluetooth”, ajo rrëfen emocionet e çmimeve që ka marrë. Më tej Atalanta shpreh se ka njohur shpesh modele që s’kanë lidhje me modelingun. Një femër e bukur nuk kishte se si të mos kishte një dashuri të madhe përkrah. Duket se bukuroshja e pasarelave është totalisht e dashuruar me partnerin e saj.
Si ka qenë kjo verë për Atalantën?
Kjo verë ka qenë më shumë e zënë se verat e tjera. Jam një njeri që merrem me shumë gjëra njëkohësisht, e duket sikur këta tre muaj u mblodhën më shumë se kurrë. Finalizova studimet universitare pesëvjeçare për arkitekturë me titullin master. Më në fund kam hapur biznesin tim të jogurterisë dhe ëmbëlsirave në Elbasan, për këtë mund të flasim gjerësisht në një intervistë tjetër. Dhe kam shijuar e do shijoj ende pushimet në jug të Shqipërisë, e ndoshta edhe jashtë.
Duket se dalloni nga modelet e tjera; nuk përfshiheni në skandale dhe s’jeni pjesë e lajmeve rozë. Është një strategji kjo?
Mendoj se asnjë nga vajzat nuk e dëshiron të përfshihet në këto lloj skandalesh, madje edhe ato që e kanë bërë, tani po përpiqen ta pastrojnë profilin e tyre. Normalisht, jam kujdesur të mos jem pjesë e tyre, por mund të them se edhe stili im i jetës jo shumë aktiv nëpër Bllok dhe jetë nate ka bërë të vetën. Mbetet një strategji, sepse dua që njerëzit të më njohin për ato gjëra për të cilat po investoj punë e mund, e jo për gjëra çasti. Jam arkitektja e fatit tim.
A ju largon nga fama ky stil?
Në Shqipëri po. Ne kemi aftësinë të bëjmë të famshëm njerëz me antivlera, që nuk përçojnë asnjë mesazh të mirë. Vazhdimisht tundohem të bie pre e këtyre stileve me ndonjë gjë të përgatitur, por më pas shikoj se sa vlerave të vërteta do u vë shqelmin njëkohësisht. Normalisht, kudo në botë do ishte e kundërta, ka plot artiste që tregojnë aq sa duan nga pjesa rozë, e më shumë për artin ose profilin në jetë.
Shumë kurora, shumë çmime; sa e shpërblyer ndiheni?
Unë ndihem shumë e shpërblyer, dhe e gjitha kjo ka ndikuar në të ndjerët një njeri më i plotësuar dhe me një ego të ushqyer mirë. Por në kuadër të vendit tonë nuk ndihem shumë e shpërblyer. Mbaj mend që kur erdha nga jashtë me një ‘valixhe’ eksperiencash, titujsh dhe mbështetjeje nga të huajt, u përballa me një realitet ndryshe nga ç’isha mësuar dhe kuptova që duhej ta pranoja këtë gjë.
Cila është ajo kurorë që e keni shijuar më shumë, që jeni përlotur kur e keni marrë?
Më emocionuese ka qenë kurora e parë. Ajo e “Miss International Automoto Sport 2014” në Vodice, Kroaci. Ishte momenti që më shkëputi përgjithmonë nga të qenët një vajzë e thjeshtë. Ai moment më ndryshoi jetën. Më pas vlen të përmendet momenti kur mora titullin “Miss Grand Sea 2015” në Sofje, Bullgari. Ai çast më ka përlotur, sepse vlera e atij evenimenti ishte e madhe dhe me peshë në botën e miseve edhe nga numri i shteteve pjesëmarrëse.
Jeni zhgënjyer nga ky profesion?
Jam zhgënjyer se pse nuk ndenja jashtë të vazhdoja më shumë, por shkollimi i lënë përgjysmë më detyroi të kthehesha. Jam zhgënjyer në shumë evenimente. Kjo fushë është shumë më e pisët sesa mendoni dhe ka shumë prapaskena. Duhet të jesh shumë e vëmendshme dhe e zgjuar që të kuptosh çdo gjë e të gjesh zgjidhjen e duhur.
Njihni modele që nuk kanë shumë lidhje me pasarelat dhe modelingun?
Në Shqipëri pothuajse të gjitha nuk kanë shkelur askund në ndonjë pasarelë apo sfilatë misi. Është për të ardhur keq kjo gjë, sepse nuk njihen profesionistet, por modelet e “Instagram”-it. Ka dhe nga ato të tjerat të cilat kanë ecur vetëm si fotomodele, por në realitet janë larg nga fotot e publikuara.
Çfarë raporti keni me to?
Të gjithë njihen me të gjithë në Shqipëri. Unë nuk jam tip inatçor, madje ruaj raporte të mira. Nëse je mike me mua, je prej shoqërisë e jo se çfarë bën apo hiqesh në jetë.
Sa i kushton bukuria Atalantës?
Shumë! Jam një njeri që shpenzoj maksimalisht për mirëmbajtje trupi, flokësh, make-up-i, veshje etj. E bukura kushton dhe do mirëmbajtje të vazhdueshme. Kushdo në këtë profesion, sadopak e përfshirë, e di që kjo formulë kështu funksionon. Nëse nuk e bën, hap krahun dhe zëvendësohesh.
Si ia dilni që ta mbani veten kaq në formë?
Jam shumë me fat gjenetikisht. Nëse sheh nënën time, ka trup pothuajse me linja dhe e dobët si unë. Por nuk mund të lë pa përmendur edhe aktivitetet fizike në nivel të moderuar. Dietat e shëndetshme ushqimore. Sidomos të qenët vegjetariane (kjo gjë jo për dietë, por si stil jete pro të drejtave të kafshëve) e ndihmon shumë një trup të mirë, sepse eliminon yndyrat shtazore dhe fokusohesh te frutat, perimet e pastat.
Një femër plot sharm; sa ju ngacmojnë meshkujt?
Çdo femër ka ngacmime në ditët e sotme. Të paktën në Shqipëri, se jashtë nuk funksionon kështu. Normalisht që ngacmohem shumë, e ca raste fare, pasi mendojnë se të gjitha modelet gjuajnë lart. Përkundrazi, unë jam shumë njeri i thjeshtë po të më njohësh.
Po ata të famshmit?
Të famshmit shqiptarë përgjithësisht nuk sillen si të tillë. Flas për meshkujt më së shumti. Normalisht që ngacmojnë, pasi të lidhin evente dhe vende që frekuentojmë. Por kur kujton se me kë janë lidhur më përpara (pasi jeta private këtu njihet), automatikisht kthehesh te djemtë e thjeshtë (qesh).
Si është jeta juaj private?
Momentalisht jam e lidhur dhe më se e lumtur. Kjo ndjesi është diçka që nuk blihet. Kur mendon se ke dikë që do bënte gjithçka për ty në të mirë e në të keq.
A keni plane për martesë?
Është ëndrra e çdo femre të martohet. Normalisht edhe e imja. Imagjino një arkitekte si unë se çfarë ëndrrash kam për arredimet e zbukurimet e dasmës. Do vijë edhe ajo periudhë, në kohën dhe momentin e duhur.
Vini shumë sensuale në fotot tuaja; a keni marrë ndonjë ofertë për të dalë nudo?
Po, kam marrë. Por nuk i mendoj kurrë seriozisht, sepse nuk më pëlqen kjo gjë. Nëse do bëhej fjalë për një kauzë të mirë e të ishte një nudo artistike, pa vulgaritet dhe e mbuluar me lezet, do mendohesha.
Kush është shuma që zhvesh Atalantën?
Nuk ka shumë që më zhvesh. Do bëja sete artistike feminile pa u vulgarizuar, me një peshqir për shembull, e mbuluar vende-vende, e kjo për një kauzë të mirë. Ndryshe jo.
Ndërkohë, projekte të reja keni edhe për shtatorin; ku do t’ju shohim?
Dëshirat e mia janë të mëdha. Përpjekjet gjithashtu. Ëndrra ime e kahershme është televizioni. Uroj të realizohet. Edhe po s’u bë, këtu jam prapë, nuk dorëzohem.
Çfarë mendoni për modelet që kanë pushtuar televizionet shqiptare si moderatore?
Përgjithësisht i njoh, dhe janë vajza të këndshme, që kanë ardhur nga vite të tëra televizion. Disa si velina e të tjera si gazetare. Mendoj se ka ardhur koha e miss-eve me universitet të sjellin risi.
A mjafton bukuria për televizionin?
Nuk mjafton të jesh veç e bukur. Diku do çalosh e do krijosh impaktin e një vajze pa tru e veç me bukuri. E bukur dhe e zgjuar është kombinim fatal. Është ajo prerja e artë ku ti shpalos vite të tëra dije në një ekran ku shkëlqen esterikja.
Për të marrë lajmet e fundit të “Gazeta Shqiptare”, ndiq faqen tonë në Facebook.
