Partia Demokratike ka denoncuar këtë të martë, shkeljet ligjore që po bën mazhoranca me kandidatët e kualifikuar për organet e Vettingut, KLP dhe KLGJ.
Në një konferencë për mediat, ish-ministri i Drejtësisë, njëherësh këshilltari ligjor i grupit parlamentar të PD Gazment Bardhi, ka treguar me emra dhe me vendime gjykate, se si një nga kandidatët madje rezulton i dënuar me vendim gjykate për kryerjen e një vepre penale.
“Kandidati per anetar ne Keshillin e Larte Gjyqesor, nga shoqeria civile Altin Hazizaj ka deklaruar se nuk është dënuar asnjëherë me vendim gjyqësor të formës së prerë për kryerjen e një vepre penale. Sipas dëshmisë së gjendjes gjyqësore rezulton se Hazizaj është i dënuar dy herë me vendim penal të formës së prerë për kryerjen e një vepre penale. Ky është kriter që parashikohet në ligjin e përzgjedhjes në sistemet e drejtësisë. Dokumenti nga sekrori i dekriminalizimit per Altin Hazizaj eshte dorezuar ne Kuvend por eshte fshehur per anetaret e opozites. Ai duhej te ishte skualifikuar. Kjo e ben listen te pavlefshme”, tha Bardhi.
Më tej Bardhi vijoi denoncimet me një tjetër kandidat, për të cilin tha se edhe “ONM ka konstatuar se Ilir Panda ka qenë i angazhuar politikisht në nivele shumë të larta në të kaluarën”.
“Kozma Jano ka qenë bashkëpunëtor i Sigurimit të Shtetit me pseudonimin “telefoni”. Ky fakt nuk është provuar vetëm nga ky dokument, por në 1996 ka pasur një komision të integritetit të individëve dhe këtu kemi vendimin e komisionit Mezini ku është provuar që Kozma Jano ka qenë bashkëpunëtor i Sigurimit të Shtetit. Ka qenë kryetar i Partisë Komuniste për degën Lushnje dhe në 2011 ka qenë kandidat për këshilltar bashkiak në Lushnje”, vijoi Bardhi