Vota e emigrantëve ka qenë sërish në qendër të vëmendjes këtë të martë, në një aktivitet ku të pranishëm ishin mes të tjerave Ministri i Brendshëm Fatmir Xhafaj dhe Ministri i Diasporës Pandeli Majko.
Në fjalën e tij, Ministri Xhafaj theksoi se çështja kryesore që lidhet me votën e emigrantëve, është adresa e tyre, pra identifikimi i saktë i vendodhjes.
Sipas ministrit, kjo vlen si për votim me postë, ashtu edhe nëse zgjidhet votimi elektronik.
“Aspekti parësor i sistemit të votimit të emigrantëve është identifikimi i vendndodhjes së tyre. Është shumë e rëndësishme, është themelore, që sistemi i votimit duhet të sigurojë për ta tre elementë bazikë: fshehtësinë e votës, transparencë të procesit të numërimit dhe padyshim, integritet të procesit të votimit.” tha Xhafaj
Mes të tjerave, ministri i Brendshëm tha se një ndër prioritetet kryesore të qeverisë për këtë mandat është edhe saktësimi i adresave, ku banon kush, pjesë e së cilës është edhe identifikimi dhe regjistrimi i shqiptarëve që jetojnë jashtë territorit të Shqipërisë.
