Nuk kanë fund telashet për Samir Nasri. Mesfushori francez i cili prej janarit është një lojtar i lirë, ka rezultuar pozitiv në testin e anti-dopingut.
Siç raporton gazeta spanjolle “Marca” UEFA do të njoftojë javën e ardhshme pezullim për një vit nga futbolli ish-yllin e Arsenal e Manchester City.
Organi qeverisës hapi një hetim kundër Nasri vitin e kaluar ku dyshohej se kishte shkelje të rregullores kundër Dopingut të UEFA-s dhe një ankesë në Gjykatën e Arbitrazhit për Sport (CAS) u refuzua në janar.
Po sipas Marca, atij i është dhënë një dënim prej dy vjetësh, i reduktuar në një, që do ta pengojë atë të luajë futboll.
Interes për 30 vjeçarin kishin shfaqur rusët e Zenit dhe skuadra e La Ligas, Las Palmas, por nëse gjithçka konkretizohet nënshkrimi do të shtyhet të paktën deri në vitin 2019.