Jean Claud-Juncker, Kryetari i Komisionit Evropian, ka zhvilluar sot një vizitë zyrtare në Maqedoni, ku ka takuar kryeministrin Zoran Zaev.
Pas takimit ata kanë mbajtur konferencë të përbashkët për media ku folën për rrjedhën e takimit dhe temat për të cilat është biseduar, njofton Telegrafi Maqedoni.
Kryetari i KE-së, tha se akoma nuk ka datë për fillimin e bisedimeve për Maqedoninë, por shtoi se ndodhet në rrugë të duhur.
“Jam i lumtur që ndodhem në Shkup, që ka kohë të gjatë që nuk kam qenë këtu. Ajo që ndodh në Ballkan, gjegjësisht në këtë vend. Vendi juaj e kupton se Evropa nuk është vetëm bashkësi ekonomike, por bashkësi edhe e vlerave demokratike. Ju keni realizuar reforma që e kanë habitur edhe botën, arritët që me Bullgarinë të nënshkruani marrëveshje për fqinjësi të mirë dhe inkurajoj Zaevin, i cili e rriti reputacionin e këtij vendi. Sa i përket emrit të shtetit, nuk dua të them asgjë, pasi kjo ju mbetet juve ta zgjidhni këtë me miqtë tuaj grek. Nuk kemi ardhur këtu t’u japim datë për bisedime, por kemi ardhur t’u themi se jeni në rrugën e duhur dhe duhet të vazhdoni. Mbeten akoma hapa për të bërë drejt reformave”, tha Juncker.
Ndërsa nga ana e tij, Zoran Zaev u shpreh i kënaqur që Juncker zgjodhi Maqedoninë si të parën për ta vizituar në turin e tij ballkanik. “E falënderoj Junckerin që zgjodhi Maqedoninë, si të parën për ta vizituar në rajon, ku na njoftoi për strategjinë e zgjerimit të BE-së në Ballkan. Me këtë strategji, BE e vërtetoi të ardhmen evropiane të Maqedonisë. Nga ana jonë edhe një herë e përsërisim vullnetin për reforma dhe anëtarësim në organizatat evropine. Sa më shpejtë i zbatojmë reformat, aq më shpejtë do të shkojmë drejt Evropës”.
