Të paktën 1 ton kokainë është zbuluar dhe sekuestruar nga policia spanjolle në Madrid, në një mega-operacion kundër narkotrafikut, ku u shkatërrua një bandë e përbërë nga shqiptarë.
Lajmi bëhet i ditur nga mediat e huaja, sipas të cilave në pranga kanë përfunduar 5 persona.
Emrat e të arrestuarve nuk bëhen të ditur, por mësohet se janë 2 shqiptarë, 2 spanjollë, si dhe lideri i organizatës me kombësi kolumbiane.
Në operacionin ku u përfshinë DEA amerikane dhe Europol, u bë i mundur sekuestrimi i një sasie rekord kokaine prej 1 ton, si dhe një shumë prej 1.5 milionë euro.
Hetimet për këtë organizatë kriminale nisën në Nëntor. Nga hetimet, u zbulua se shqiptarët kishin për detyrë transportimin e kokainës nga Kolumbia me anë të avionëve të vegjël.
Banda fuste lëndën narkotike në Spanjë me fluturime charter, duke u shtirur si një kompani që ofronte transport. Më pas kokaina shpërndahej nëpër të gjitha vendet e Europës.
Gjatë operacionit, agjentët e policisë spanjolle zbuluan dhe sekuestruan në total 790 pako me kokainë, disa automjete shumë kubikëshe, telefona dhe karta identiteti false, si dhe municione.
Në të njëjtën kohë, hetimet vazhdojnë për të zbuluar lidhjet e tjera të bandës me trafikantë të tjerë në vendet e ndryshme të Europës.