Ka nisur më së miri Kupa e Botës “Rusi 2018” për vendin organizator, e cila ka mposhtur me rezultatin e thellë 5-0 Arabinë Saudite në ndeshjen që çeli siparin e kompeticionit më të rëndësishëm futbollistik në planet.
Në një atmosferë elektrizuese, rusët nisën fuqishëm ndeshjen në “Luzhniki Stadium” duke kaluar në avantazh që në minutën e 12 me anë të Yuri Gazinskiy.
Ndërsa pak para përfundimit të pjesës së parë dyfishoi shifrat Denis Cheryshev.
Në pjesën e dytë, rusët nuk e ulën ritmin përkundrazi shënuan edhe tre herë të tjera me Artem Dzyuba në minutën e 72, Cheryshev në minutën e 91 dhe për 5-0 u kujdes Aleksandr Golovin, duke shënuar gol të bukur në fund nga gjuajtja e lirë.
Rusia tashmë merr vendin e parë në Grupin A me 3 pikë, ndërsa nesër në ora 14:00 zhvillohet sfida tjetër e këtij grupi mes Egjiptit dhe Uruguait.