“Vendimi i BE-së për të shtyrë deri në qershor 2019 hapjen e negociatave për Shqipërinë, duhet lexuar si një arritje me gotën gjysmë plot”.
I këtij mendimi është Kryeredaktori i “Gazetës Shqiptare” Erl Murati, i ftuar këtë të enjte në emisionin “Intervista e Ditës” me Erjon Çiku.
Murati theksoi se ky vendim tashmë vulos përgjithnjë të ardhmen europiane të Shqipërisë, por se nga ana tjetër i kërkohet vendit tonë që brenda 1 viti të bëjë “detyrat e shtëpisë”.
Sipas tij, në këtë vendim ka ndikuar jo pak gjendja brenda BE-së me euroskeptikët si një lob gjithnjë e në rritje brenda unionit.
Megjithatë Kryeredaktori i “Gazetës Shqiptare” nënvizon se tashmë vendi ynë duhet të tregojë jo vetëm përgjegjësi në përmbushjen e detyrave të përcaktuara, por se kërkohet luftë konkrete në drejtim të krimit të organizuar dhe korrupsionit.
Duke u ndalur tek politika e brendshme, gazetari Erl Murati nuk përjashton as ndryshime në qeveri, që sipas tij nuk kanë pse të shihen si një aspekt negativ. Por si një rifreskim që i bëhet me të drejtë kabinetit qeveritar.