Tre skuadrat shqiptare Partizani, Laçi dhe Luftëtari do të zhvillojnë mbrëmjen e sotme ndeshjet e tyre të kthimit të Europa League.
Në ndeshjet e zhvilluar një javë më parë, të tria ekipet janë mundur, por me shanse të ndryshme për ndeshjet e kthimit. Partizani u mund 0-1 në “Selman Stërmasi” nga sllovenët e Mariborit, në një ndeshje deri diku të barabartë. Edhe pse në letër kundër një ekipi pretendent, të kuqtë e drejtuar nga Skënder Gega do të luajnë shanset e tyre sot. Ndeshja mes Mariborit dhe Partizanit do të luhet në orën 20:15.
Ndërkohë, sfida tjetër do të zhvillohet në “Elbasan Arena”. Luftëtari do të luajë përballë letonezëve të Ventspilsit thjesht një ndeshje statistike. Humbja 5-0 në takimin e parë nuk i jep thuajse asnjë shans gjirokastritëve për të kaluar për më tej në këtë debutim në kupat e Europës. Pas një paraqitjeje mjaft të mirë nën drejtimin e Hasan Likës në sezonin e shkuar, gjithçka në imazhin e saj u rrëzuan me një ndeshje të çuditshme nën drejtimin e trajnerit të ri Milosh Kostiç.
Ndërkohë në Laç, kurbinasit do të përpiqen të bëjnë diçka për të përmbysur humbjen 2-1 në ndeshjen e parë kundër Anorthosit. Në ndeshjen e parë në Qipro ishin pikërisht laçianët që kaluan të parët në avantazh me golin e Hoxhallarit, por gjithçka u përmbys në pjesën e dytë në shifrat 2-1, duke lënë ende shpresa për skuadrën e Laçit që të pretendojë për të kaluar në raundin e dytë kualifikues të kupës Europa League.
Kështu që tre sfidat nuk duhen humbur për t’u parë.
