Federata Shqiptare e Futbollit zyrtarisht i kërkon qeverisë të ndryshojë ligjin për sigurinë në stadiume. Reagimi vjen pas përleshjes së ditës së premte mes tifozëve të Skënderbeut dhe Partizanit në stadiumin e Korçës.
Mungesa e policisë në ambientet e brendshme të stadiumit bëri që tifozët të zbrisnin në fushën e lojës duke hedhur në drejtim të njëri-tjetrit sende të forta dhe gurë. Nuk munguan edhe të lënduarit, ndërsa situata shtrëngoi gjyqtarin
Eldorjan Hamiti të ndërpriste sfidën deri sa gjendja të qetësohej.
Vetëm ndërhyrja e forcave të policisë që ishin jashtë stadiumit vendosën rregullin. Forcat e rendit këtë sezon nuk do të jenë të pranishëm në brendësi të stadiumit ku do të qëndrojë siguri private.
“Organizimi dhe mbarëvajtja e garës mbetet prioritet absolut i saj. Incidenti në stadiumin e Korçës duhet të jetë një moment emergjent reflektimi për sa i përket sigurisë në stadiume dhe prezencës së policisë së shtetit në to. Tensioni i prodhuar në Korçë nuk mund të përligjë në asnjë moment amendime ligjore të parakohshme dhe që lëkundin sigurinë publike në stadiume”, theksohet në njoftimin zyrtar.
Ndeshja hapëse e superiores në fund u fitua nga Skënderbeu me rezultatin 1 – 0.