Tirana zyrtare është gati të përmbushë detyrimet e saj sa i përket NATO-s. Vetë ministrja e Mbrojtjes, Olta Xhaçka gjatë një ceremonie për stërvitjen shumëpalëshe “Albanian Lion 2018”, theksoi se krijimi i bazës ajrore të NATO-s në Kuçovë, dëshmon seriozitetin dhe rolin e shqiptarëve si faktor stabiliteti për paqen dhe sigurinë në rajon.
“Ne do të vazhdojmë të përmbushim detyrimet tona ndaj NATO-s, ku Shqipëria mbetet vend me kontribute të qenësishme. Ne mbështesim të gjitha iniciativat e Aleancës dhe tashmë pas 9 vitesh anëtarësim në NATO, vendi ynë është transformuar në një vend që po kontribuon në Aleancë.”
Xhaçka përshëndeti 1200 ushtarakët e përfshirë në këtë stërvitje, të cilët janë nga Britania e Madhe, Kroacia, Kosova, Shqipëria dhe Sllovenia.
“Për herë të parë në këtë stërvitje ishte edhe Forca e Sigurisë së Kosovës, e cila po ngrihet dhe po tregon dita-ditës seriozitet. Zhvillimi i kësaj stërvitje tregon aftësitë ndërvepruese dhe kohezionin ndërmjet Forcave tona të Armatosura dhe aleatëve për rritjen e sigurisë së jetës”, deklaroi ministrja.
