Kryeministri i Suedisë Stefan Lofven do të duhet të largohet nga posti, pasi humbi mbështetjen e parlamentit.
Demokratë Suedezë, parti kundër emigracionit (SD), mbështetën votimin për ta larguar Lofven, disa javë pas zgjedhjeve të përgjithshme që mbanin një parlament të varur.
Në votimin e së martës, 204 deputetë votuan kundër Lofven, ndërsa 142 votuan në favor të tij.
Kryetari i Parlamentit tani do të propozojë një udhëheqës të ri, një proces që mund të zgjasë disa javë.
Lofven, kreu i socialdemokratëve të qendrës së majtë, pritet të qëndrojë si kryeministër në detyrë, derisa të zgjidhet pasardhësi i tij.
Ai erdhi në pushtet në vitin 2014. Aleanca e tij e qendrës së majtë fitoi 144 vende në zgjedhjet e këtij muaji, një më shumë sesa opozita e qendrës së djathtë.
Asnjë nga blloqet kryesore nuk synon të qeverisë me SD-në nacionaliste, partinë e tretë më të madhe në parlamentin e ri.
Por, detyra e kryeministrit mund t’i shkojë Ulf Kristersson, udhëheqës i të moderuarve.
Kristersson shihet gjerësisht si personi që ka më shumë gjasa të formojë një qeveri të re, e nëse ai dështon do të ftohen blloqet e tjera për diskutime, duke përfshirë vetë Lofven.