Pas paraqitjes zhgënjyesë të bërë në ndeshjen miqësore kundër modestëve ndaj Jordanisë, Kombëtarja shqiptare vijon ecurinë e saj të dobët edhe në ndeshjet e Ligës së Kombeve.
Kuqezinjtë morën humbjen e dytë rradhazi në grup – ku pas disfatës së pësuar kundër Skocisë me shifrat 2-0, të njëjtën humbjen morën dhe në takimin e mbrëmjes së sotme kundër Izraelit.
Një disfatë që konfirmon momentin negativ që po kalojnë djemtë e Panuçin të cilët janë në momente krize, që ende nuk po arrijnë dot të zgjidhin këtë situatë të rëndë.
Edhe pse Shqipëria arriti që të dominojë takimin e sotëm ndaj Izraelit, këta të fundit ishin më rezultativ në momentet finalizuese duke u treguar më të saktë se lojtarët tanë.
Goli i parë për vendasit u shënua që në minutën e 8-të të takimit me anë të Hemed që shfrytëzoi një gafë të mbrojtjes shqiptare duke e dërguar topin në fund të rrjetës.
Deri në minutën e 83-të Shqipëria ishte ajo që po e dominonte takimin duke e zhvendosur kundërshtarin në gjysmëfushën e tyre, por ajo që u mungoi ishte goli.
Dhe kjo u realizua nga kundërshtari që shënoi golin e dytë në minutën e 84-të me anë të Saba që realizoi nga një goditje jashtë zone.
Një tjetër humbje zhgënjyese për Shqipërinë e Kristian Panuçit i cili është në krizë rezultatesh dhe loje me këtë ekip.
Pas kësaj disfate Shqipëria renditet në vendin e fundit në renditje me vetëm tre pikë, ndërsa vendi i parë mbahet nga Izraeli me gjashtë pik.
Ndeshja e rradhës për Shqipërinë në Ligën e Kombeve do të jetë kundër Skocisë.
