Vetëm pak orë ka zgjatur kryesimi i Skënderbeut, pasi korçarët janë “rrëzuar” në vendin e dytë të Superligës, pas fitores që Partizani regjistroi pak minuta më parë ndaj Luftëtarit. Të kuqtë mposhtën me shifrat minimale 2-1 gjirokastritët, por i mjaftoi për të marrë 3 pikët dhe për tu rikthyer aty ku ishin pak orë më parë, dhe për ta mbyllur në krye të klasifikimit fazën e parë.
Golat e Mensah dhe Bruno Telushit i siguruan Partizanit fitoren e 7-të në 9 javë kampionat. Goli i nderit për bluzinjtë mban firmën e Shkurtaj. Pas kësaj fitoreje kryeqytetasit komandojnë Superligën në kuotën e 22 pikëve, ndërkohë që Luftëtari regjistron humbjen e 7-të në këtë sezon.
Në 9 javët e para bluzinjtë kanë marrë vetëm dy fitore, duke vendosur në pikëpyetje të ardhmen e teknikut Gentian Mezani, i cili ende nuk e ka gjetur formulën e suksesit për skuadrën që në sezonin e shkuar bëri mrekullinë, duke u kualifikuar në Kupat e Evropës.