Rusia po organizon një takim shumëpalësh për paqen në Afganistan dhe ka përfshirë në të Talibanët. Por ShBA-ja dhe qeveria afgane e mbështetur prej saj, e kanë refuzuar ftesën. Rusia po tregohet aktive në Afganistan me plane investimesh dhe qasje kulturore e diplomatike.
Bisedimet shumëpalëshe për paqen në Afganistan u hapën të premten në Moskë me pjesëmarrjen e Talibanëve dhe Këshillit të Lartë Afgan për Paqe, por mungonte delegacioni i qeverisë afgane.
Rusia ka ftuar 12 vende dhe Talibanët, që po luftojnë për të rivendosur në fuqi ligjin e ashpër islamik i cili u rrëzua pas ndërhyrjes së trupave amerikane në vitin 2001.
Në këto bisedime mungojnë Shtetet e Bashkuara dhe qeveria afgane e mbështetur prej tyre.
Presidenti afgan, Ashraf Ghani, e refuzoi ftesën me pretendimin se bisedimet duhen drejtuar nga qeveria afgane.
Sipas Kremlinit, deri tani për bisedime kanë mbërritur përfaqësues nga Irani, Kina, Pakistani, Taxhikistani, Uzbekistan dhe Turkmenistani.
Bisedimet e Moskës nënvizojnë rolin aktiv që Rusia po luan në Afganistan, disa dekada pas tërheqjes së trupave sovjetike nga vendi, me plane biznesi e investimesh, qasje diplomatike dhe kulturore, e më pak mbështetje ushtarake për qeverinë qendrore.