Nëse nga njëra anë për Kryeministrin Edi Rama politika është lojë shahu, Presidenti i Republikës Ilir Meta ka zgjedhur t’i përgjigjet në distancë.
I ftuar në emisionin “Open”, Kreu i Shtetit tha se mosdekretimi i Lleshit nuk është as lojë shahu dhe as tërheqje litari.
Por se sipas tij, në interes të tij janë vetëm qytetarët dhe mbrojtja e Kushtetutës.
Pjesë nga intervista:
“Unë e di se politika është lojë shahu. Por unë nuk po bëj as lojë shahu as tërheqje litari. Unë shoh vetëm interesin qytetar dhe mbrojtjen e Kushtetutës. Presidenti nuk ka asnjë interes të bëjë përplasje politike. Nëse do këtë mund ta bëjë shumë thjesht sepse është zyrtari më i rëndësishëm në vend. Sepse çdo betejë me Presidentin nuk është e thjeshjtë. Por Presidenti që keni këtu i di shumë mirë detyrat dhe përgjegjësitë e tij.”
Po dekretimi së fundmi i Helidon Bendos në krye të SHISH a ishte lojë shahu?
“Jo nuk ka qenë lojë shahu. Besoj se unë kam përgjegjësi më shumë se të tjerët. Dhe me qëllim forcimin e këtyre institucioneve të rëndësishme për vendin kërkohet pak më shumë kohë.”
Ju jeni shprehur se koha e drejtimit me Sekretar të parë ka përfunduar. Kush është ky Sekretar i parë?
Koha e sekretarit të parë ka ikur.
Po thoni se Edi Rama po sillet si Sekretar i Parë?
Nuk e thashë këtë gjë. Ne jemi një vend që vijmë nga një trashëgimi autoritare dhe është tepër e rëndësishme të mbrojmë këto standarte demokratike që kemi.
Cila është marrëdhënia me Kryeministrin?
Unë kam marrëdhënie shumë korrekte me të gjithë.
Marrëdhënia e krisur thotë Edi Rama…
Unë u lodha me këto lavdërime për Presidentin Meta, por unë jam këtu për të bërë detyrën time për mbrojtjen e Kushtetutës.
Jeni gati ta çoni krisjen në thyerje?
Nuk kam ndërmend asgjë tjetër vetëm mbrotjen e Kushtetutës. Dhe është tepër e rëndësishme që të mos shpenzojmë energjitë për konflikte të panevojshme.
