Arben Ahmetaj, ministri i Ekonomisë dhe i Financave, nga foltorja e Kuvendit duke folur për buxhetin, shigjetoi drejtuesit e opozitës.
Sipas Ahmetaj, ish-kryeministri Sali Berisha nuk ka ndërtuar rrugë, por ka hapur vetëm tendera. “Saliu nuk bëri rrugët, por bëri tendera. I la rrugët rrugëve. Të gjitha rrugët ishin hapur me dy ose tre milionë lekë. Buxheti i infrastrukturës është një proces i maturuar”, – tha Ahmetaj.
Duke vijuar më tej, ministri i Ekonomisë, u shpreh se arteriet më të rëndësishme të rrugëve do përfundojnë përmes projektit 1 miliard dollar brenda 2021. “Këtu ia vlen t’i referohemi Rrugës së Arbrit dhe rrugëve të tjera, të cilat do të ndërtohen deri në 2021.
E dini se projekti i 340 milionë dollarë i rrugës Tiranë-Elbasan sot i ka shkuar mbi 400 milionë dollarë. Janë 190 mijë nxënës që përfitojnë nga librat falas, janë shumë mësues që përfitojnë nga transporti falas. Po ulim borxhin, por rrisim investimet dhe pagat”.
