Sokol Cikalleshi është rikthyer përsëri protagonist në Turqi. Sulmuesi kavajas duket se arrin të “nuhasë” golin kur bëhet fjalë për ndeshjet e Kupës. Shqiptari ka arritur të shënojë golin e tij të dytë në po kaq ndeshje për ekipin e Goztepe. Edhe pse golat mungojnë në kampionat, sulmuesi nuk i “kursen” golat e tij për në ndeshjet e Kupës, duke dhënë maksimumin dhe duke nxjerrë në pah potencialin e tij të vërtetë. Cikalleshi është kthyer në një “kartë të fshehtë” për ekipin nga Turqia për sa u përket ndeshjeve në Kupë, të cilat duket se janë të preferuarat e tij. 14 është kuota e golave që bomberi shqiptar ka arritur në këtë kompeticion që kur ai ka zbarkuar në Turqi në vitin 2015.
Gjithashtu, edhe Liridon Latifi ka gjetur rrugën e rrjetës në kupë ndaj Penygior, teksa skuadra e tij fitoi me rezultatin e thellë 0-6 në transfertë, duke ndihmuar kështu Pushkash Akademinë që të kualifikohet mes 16 më të mirave të Hungarisë. Ishi i Skënderbeut shënoi golin e 3-t në minutën e 78-të, teksa u aktivizua nga trajneri si titullar. Edhe pse roli i tij natyral është mesfushor krahu ofensiv, Latifi u aktivizua si sulmues i mirëfilltë në këtë sfidë. Për sa i përket aktivizimit në kampionat, ka qenë me pikatore. Në 5 ndeshjet e fundit futbollisti i Kombëtares shqiptare është aktivizuar vetëm 84 minuta.
