Skuadra e Luftëtarit është në kulmin e përgatitjeve për transfertën që do të zhvillojë në Korçë me Skënderbeun. Bluzinjtë kanë një nga transfertat më të vështira, e megjithatë skuadra është duke u përgatitur dhe vlerësuar maksimalisht kundërshtarin e radhës. Por, në seancën e djeshme stërvitore siç edhe mëson “Vipsport”, ka qenë i pranishëm edhe presidenti i skuadrës, Grigor Tavo, i cili ka takuar jo vetëm stafin, por edhe skuadrën.
Tavo ka kërkuar nga skuadra përqendrim maksimal në dy ndeshjet e radhës, pasi financat i kanë të garantuara. Trajneri Gentian Mezani, nga ana tjetër ka zhvilluar një stërvitje të plotë, ndërsa pozitive është se skuadra do të jetë e plotë në sfidën e radhës në Korçë, ndryshe nga takimet pasardhëse, ku thuajse në çdo ndeshje Luftëtari ka pasur probleme mungesash nga dëmtimet apo kartonët.