Aksioni i minutës së 84-t të pjesës së dytë të ndeshjes mes Skënderbeut dhe Luftëtarit do të kujtohet për një kohë të gjatë, pasi ishte ai që përcaktoi fatin e ndeshjes mes dy skuadrave. Një gjuajtje drejt portës devijohet me kokë nga Kaba Sambou dhe gjyqtari Hermal Llapra bën shenjë nga pika e bardhë. Në stadium nisin protestat dhe me të drejtë, pasi lojtarët i bëjnë me shenjë kryesorit se mbrojtësi ka prekur topin me kokë.
Protesta pa fund, por Llapra nuk u kthen përgjigje, vetëm bën shenjë nga pika e bardhë, duke tensionuar edhe më shumë situatën. Pas ndeshjes, pasi situata ishte tensionuar për minutat e mbetura, në tribuna dhe në fushë, sipas “SuperSport”, ai ka shpjeguar se kishte dhënë penalltinë, meqë kishte cilësuar faull rrëshqitjen e Sambou, që kishte devijuar topin me kokë, por me këmbë kishte ndërhyrë në mënyrë të parregullt ndaj kundërshtarit.