Është dhunuar në ambientet e qelisë Aleko Petro, babai 52-vjeçar që masakroi pak ditë më parë vajzën e tij Anxhelinën.
Ngjarja ka ndodhur në burgun e Koridhalos, ku 52-vjeçari është dhunuar nga të burgosurit e tjerë.
Lajmi është bërë i ditur nga Vasilis Noulezas, avokati i shqiptarit, i cili ka deklaruar se pas kësaj ngjarje Aleko Petro është dërguar në spital për trajtim mjekësor.
Sipas avokatit, 52-vjeçari është në gjendje të rënduar psikologjike.
Sipas rrëfimit të vetë 52-vjeçarit, disa të burgosur e kanë sulmuar dhe dhunuar egërsisht. Për këtë arsye ai ka kërkuar që të transferohet në burgun e Grevenas, ka frikë për jetën e tij.
Kujtojmë se Aleko ndodhet nën masën e sigurisë burg pa afat, pasi ka pranuar që dhunoi për vdekje vajzën e tij Anxhelina Petro, pasi nuk pranonte lidhjen e saj me një emigrant afgan.
Ngjarja e rëndë ka ndodhur në Korfuz më 2 Janar. Ndërkohë, trupi i Anxhelina Petros mbërriti në Shqipëri më 8 Janar dhe u përcoll për në banesën e fundit.
