Demokratët dhe republikanët kanë arritur në parim një marrëveshje mbi sigurinë e kufirit për të financuar qeverinë amerikane dhe për të shmangur një tjetër mbyllje të pjesshme.
Negociatorët thanë se marrëveshja përfshin financime për disa barriera të reja në kufirin e SHBA-së me Meksikën.
Megjithatë, shuma nuk është as afër 5.7 miliardë dollarëve që presidenti Donald Trump ka kërkuar për ndërtimin e një murit.
Marrëveshja ende duhet të miratohet nga Kongresi dhe të nënshkruhet nga presidenti.
Presidenti Trump nuk u shpreh nëse do e mbështeste këtë marrëveshje, por theksoi edhe njëherë premtimin e tij.
“Ne do e ndërtojmë këtë mur gjithsesi”, tha ai.
Demokratët, të cilët tani kontrollojnë Dhomën e Përfaqësuesve, kanë refuzuar të miratojnë fondin prej 5.7 miliardë dollarë për ndërtimin e murit me Meksikën, një nga premtimet kryesore të presidentit Trump gjatë fushatës.
